بلوچ آجوئی لشکر ( بی ایل اے ) ءِ جارکش آزاد ءَ ماں رسانکدر ءَ بلوچستان ءِ جتائیں دمگاں وتگڑیں پاکستان ءِ آجوئی پروگرام ءُ پاکستانی لشکر ءِ سر ءَ راکٹ ءُ بمب اُرشانی زمہ واری منّ اتگ ءُ گوشتگ کہ ھشت جتائیں اُرشاں نشانگ کرتگ اَنت۔
آئی ءَ گوشتگ کہ مئے سرمچاراں 13 اگست ءَ ھاران شھر ءَ یک لیب جاھے ءَ برجاھیں وتگڑیں پاکستانی آجوئی روچ ءِ شاتکامی گوں بمب ءَ نشانگ کرتگ۔
جارکش ءَ گوشتگ کہ سرمچاراں ھما وھد ءَ اُرش کرتگ کہ لشکر ءِ کمک ءَ لیب جاہ ءَ پٹبال ٹورنامنٹ ءِ لیب برجاہ بوتگ۔ اے ارش پہ کڈن کنگ ءَ کرتگ، ھیال داشتگ کہ شھرمنند ھچ پیم ءَ تاوان مہ بنت۔
آئی ءَ گوشتگ کہ ھاران ءَ لھتے زرگپتیں مردم لیب، وانگ ءُ آدگہ ارزشتداریں بھرگاں پہ پاکستانی لشکر ءِ ناشریاں کارمرز کنگ ءَ اَنت۔ آیاں کڈن کن ایں کہ چاگرد ءُ زرمبشت دژمنیں کارپداں یل بہ کن اِت اگاں نہ سرپراز سپو ءِ وڑ ءَ بہ اِت۔ سرپراز سپو آ یک ردیں لیبی یے کہ ھاران ءَ لیب ءِ بھرگ ءَ پاکستانی لشکر ءُ چیریں ادارھانی پرمان ءِ رد ءَ دارگ ءِ جھد کرتگ ءُ ھمے وڑ ءَ لشکری پروگرامانی پارست ءَ لشکری دودمان پہ زور بلوچ چاگرد ءِ بھر جوڑ کنگ ءُ پاکستانی لشکر ءِ چکچینی شونداتانی ھوار گیجگ ءِ وڑیں کاراں ھوار بوتگ۔
جارکش ءَ گوشتگ کہ ما چہ ایشی پیش وتی شونداتی درشان شنگ کرتگ ءُ گوشتگ کہ بلوچ لس مردم پاکستان ءِ دروگیں آجوئی شاتکامیانی بھر مہ بنت۔ پمیشکا یکبرے پد ءَ ھاران ءِ درسیں لیباں ھمگرنچیں لیبیان ءُ سرکاری نوکر ءُ سروگاناں کڈن کن ایں کہ ھند ءَ وتگڑیں چاردہ اگست ءَ ھوار چہ پاکستانی لشکر ءُ چیریں ادارھانی ھر پیمیں پروگراماں دور بہ بنت۔
آئی ءَ گوشتگ کہ دومی اُرش ءَ مئے سرمچاراں 13 اگست ءِ بیگاہ ءَ کلات ءِ ھند منگچر ءَ زورگریں پاکستانی لشکر ءِ مزنیں بنجل ءِ سر ءَ گوں گرنیڈ لانچر ءَ اُرش کرتگ۔ سرمچاراں بنجل ءِ گچینیں جاہ نشانگ کرتگ اَنت۔ اُرش ءِ آسر ءَ زورگریں لشکر ءَ تاوان بوتگ۔
جارکش ءَ گوشتگ کہ سیمی اُرش 13 اگست ءِ بیگاہ ءَ مئے سرمچاراں تربت واستو بازار ءَ بس ٹرمینل ءِ نزیک ءَ پاکستانی لشکر ءِ ترّ ءُ گرد کنوکیں چہ دو گاڑیاں یکے گوں دستی بمب ءَ نشانگ کرتگ۔
آئی ءَ گوشتگ کہ چارمی اُرش ھم 13 اگست ءِ شپ ءِ نو ءَ مئے سرمچاراں کلات ءِ ھند شاہ مردان ءَ زورگریں پاکستانی لشکر ءِ پانگس ءِ سر ءَ گوں راکٹ ءُ وتکاریں سلاھاں اُرش کرتگ۔
جارکش ءَ گوشتگ کہ پنچمی اُرش 13 اگست ءِ بیگاہ ءَ مئے سرمچاراں ھرنائی ءِ ھند رکنی ءَ پاکستانی لشکر ءُ چیریں ادارھانی پرمان ءَ جتگیں یک چاریگی موبائل ٹاورے ءِ سر ءَ اُرش کرتگ ءُ چاریگی ءِ ساماناں ھوار مشین مانداشتگ اَنت ٹاور تباہ کرتگ۔
آئی ءَ گوشتگ کہ ششمی اُرش 14 اگست ءِ بیگاہ ءَ مئے سرمچاراں ھرنائی ءِ ھند سپین تنگی ءَ پاکستانی لشکر ءِ سنگرانی سر ءَ کرتگ۔ ایشی آسر ءَ پاکستانی لشکر ءِ دو کارمند مرتگ ءُ سے ٹپی بوتگ۔
جارکش ءَ گوشتگ کہ ھپتمی اُرش مئے سرمچاراں کیچ ءِ ھند مند سورو ءَ پاکستانی لشکر ءُ آئی کمکارانی نیمگ ءَ کش اتگیں چاردہ اگست ءِ باروا نامگپتیں روانک پاکستانی لشکر ءِ بنجل ءِ نزیک ءَ گوں چیر کرتگیں شورھاں نشانگ کرتگ۔
آئی ءَ گوشتگ کہ ھشتمی اُرش ءَ چاردہ اگست ءِ شپ ءِ نو ءَ مئے سرمچاراں شال ءِ اکتر آباد ءَ برجاھیں پاکستانی لشکر ءِ پانگس گوں دستی بمب ءَ نشانگ کرتگ۔ اُرش ءِ آسر ءَ زورگریں پاکستانی لشکر ءِ دو کارمند ٹپی بوتگ۔
جارکش ءَ گوشتگ کہ اے ارشانی زمہ واری ءَ مئے گل بی ایل اے من ایت۔
جارکش آزاد ءَ گوشتگ کہ پاکستانی لشکر ءُ آئی زرگپتیں کارمنداں پہ وتی پھریزگ ءَ لھتیں سادگیں شھری مردم ءِ ھساب ءَ روانک ءَ ھوار کرتگ، ایشی سوب ءَ سرمچاراں گوں شواندت ءِ پارست ءَ داں گڈی وھد ءَ ھمے گپ ءِ سر ءَ سدکی داتگ کہ اُرش ءَ ھچ پیمیں بے میاریں مردم تاوان مہ بنت۔ پمیشکا ما ھند ءِ ھمک کھولاں گوں ترندی ءَ گوش ایں کہ وتی مردمانی سر ءَ ھیال ءَ گور بہ کن اَنت، بی ایل اے، اے وڑیں اُرشاں زورگریں لشکر یا آئی کارمندانی لڑا پہ زانت ھواریں چونیں ھم شھری یے سلامتی ءِ مانزمان نہ بیت۔
