بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ پنچ مئی ءَ بیگاہ ءِ شش ءَ بی ایل ایپ ءِ سرمچاراں گوادر ءِ ھند تلار ءَ پولیس ءِ برجاھیں چوکی ءِ سر ءَ ارش کرتگ ءُ مانداشتگ، پولیس کارمندانی سلاہ ءُ آدگہ سامان پل اتگ ءُ برتگ اَنت۔
آئی ءَ گوشتگ کہ پولیس ءِ اے چوکی چہ گاڑیاں زرگرگ ءِ ھاتر ءَ جنگ بیتگ کہ اود ءَ چه تیل ءِ کارکنوکیں ھندی مردمانی گاڑیاں ھمک روچ زر گرگ بیتگ۔ مردمانی گپانی بنیاد ءَ سرمچاراں اے چوکی ءِ سر ءَ اُرش کرتگ ءُ مانداشتگ، پولیس کارمند بلوچ بوگ ءِ بنیاد ءَ ھچ پیمیں تاوان نہ داتگ اَنت ءُ آ کڈن کرتگ ءُ یل داتگ۔
جارکش ءَ گوشتگ کہ ھمے میان ءَ سرمچاراں ھندی درسیں گاڑی پہ سلامتی گوازینتگ اَنت۔
آئی ءَ گوشتگ کہ ھمے شپ ءَ سرمچارانی دگہ یک ٹولی یے ءَ ریکانی دوراھی ءَ پہ چاریگی ءَ مک کرتگیں زونگ ٹاور ءِ مشین ءُ سامان مانداشتگ اَنت۔
جارکش ءَ گوشتگ کہ اے کاروائیاں پد سرمچار وتی مھکمیں بندرانی نیمگ ءَ روگ ءَ بیتگ اَنت کہ کلگ ءَ آ گوں پاکستانی لشکر ءَ دیم پہ دیم بیتگ اَنت یک میڑے برجاہ بیتگ، ایشی آسر ءَ زورگریں لشکر ءَ جانی ءُ مالی تاوان بیتگ۔
آئی ءَ گوشتگ کہ شش مئی ءِ نیمروچ ءِ دو ءَ بی ایل ایپ ءِ سرمچاراں کیچ ءِ ھند زامران ، کوتان ءَ پاکستانی لشکر ءِ یک برجاهیں چوکی یے ءِ سر ءَ ارش کرتگ۔ ارش ءَ سرمچاراں گوں اسنائپر ءَ یک کارمندے نشانگ کرتگ ءُ کشتگ۔
میجر گھرام ءَ ارشانی زمہ واری من اتگ ءُ گوشتگ کہ داں بلوچستان ءِ آجوئی ءَ وتی اُرشانی برجاہ دارگ ءِ کول ءَ کن ایں۔
