بلوچستان ءِ جیڑہ

اسلام آباد پریس کلب ءِ دیم ءَ بلوچ یکجھتی کمیٹی ءِ نیمگ ءَ زھرشانی نندانک برجاہ اِنت۔ لوٹانی نہ منگ ءِ بگیری ءَ بی وائی سی ءِ جار ءِ پد ءَ تیوگیں بلوچستان ءَ ھوار چہ بلوچستان ءَ ڈن ھم تھتگ بند ھرتال ءُ زھرشانی کنگ بوتگ۔

بلوچ یکجھتی کمیٹی ءِ زھرشانی نندانک ءِ لوٹ ھمیش اِنت کہ زوریں بیگواھی، دروگیں میڑاں زور بیگواھیں مردمانی ناھکیں کوش بند کنگ بہ بیت ءُ درسیں بیگواھیں مردم آجو کنگ یا آمیدگس ءَ پیش کنگ بہ بنت۔ اگاں چہ زور بیگواھیں مردماں کسے شھید کنگ بوتگ گڑا آئی کھول ھال دیگ بہ بیت۔

یات بہ بہ اِت کہ زھرشانی ءَ نشتگیں مردمانی لوٹانی گوش دارگ ءَ ابید زھرشانی ءَ نشگیں مردمانی کھول اسلام آباد پولیس ءِ زوراکیانی آماچ اَنت۔

چارشمبے ءِ روچ ءَ بلوچستان ءِ بنجاھی شھر شال، ھب چوکی، گْوادر، گڈانی، ھزدار، نوشکے، مستونگ، کوھلو، چاگے، دالبندین، وندر، مند، تمپ، سوراب، کلات، پنجگور، بارکان، بیسمگ، ناگ، تربت، ھاران، ماشکیل، آواران ءُ جاؤ ءَ ھوار آدگہ جاھاں تھتگ بند ھرتال کرتگ۔

بلوچستان ءَ ھوار ڈیرہ گازی ھان، تونسہ شریپ، لیاری ءُ ملیر ءَ بلوچ ھنداں باپاری جاہ بند بوتگ اَنت۔ گلگت بلتستان ءَ ھم زھرشانی ءَ نندانک ءِ پلہ مرزی ءَ تھتگ بند ھرتال بوتگ ءُ زھرشانی ءَ مردماں بازیں کچے ءَ بھر زرتگ۔