کراچی | پَسِنی: زورگریں پاکستانی لشکر ءُ چیریں ادارھانی کارمنداں دو ورنا آوار جتگ ءُ بیگواہ کرتگ۔
بنشون ءِ رد ءَ پاکستانی لشکر ءُ چیریں ادارھانی کارمنداں چه کراچی ءِ ھند نیول کالونی ءَ اوتل زانشجاه ءِ نودربر شاه نواز بلوچ ء الله بکش چه گس ءَ آوار جنگ ءَ پد زوربیگواه کرتگ.
شاه نواز بلوچ ءِ زوریں بیگواھی ءِ گپ کھول ءَ راست کرتگ ءُ گوشتگ که شاه نواز کیچ ءِ ھند بلیده ءِ جاه منند اِنت ءُ آ وتی کھول ءِ ھمرائی ءَ په الاج ءَ کراچی شتگ که 29 ءُ 30 اپریل ءِ درمیانی شپ ءَ ریاستی ادارھانی کارمنداں چه گس ءَ آوار جتگ ءُ بیگواه کرتگ.
کھول ءَ گوں بلوچ راج ءُ انسانی ھکانی ادراھاں لوٹ کرتگ که آ په شاه نواز بلوچ ءِ یل کنگ ءَ وتی کرد ءَ پیلو به کن اَنت۔
ھمے وڑ ءَ چہ پسنی ءَ چیریں ادارھانی کارمنداں ورنایے آوار جتگ ءُ بیگواہ کرتگ۔
بنشون ءِ رد ءَ آوار جنگ بوتگیں ورنا ءِ نام شے مرید ھسین انت کہ پسنی وارڈ نمبر 3 باگ بازار ءِ جاہ منند انت کہ چہ پسنی بازار ءَ ھجام ءِ دکان ءَ آوار جنگ ءَ پد زور بیگواہ کنگ بوتگ۔
