بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں بولان ءُ کیچ ءَ دو جتائیں بمب اُرشاں زورگریں پاکستانی لشکر ءِ چارده کارمند کشتگ۔
آئی ءَ گوشتگ که بی ایل اے ءِ اسپیشل ٹیکٹیکل آپریشنز اسکواڈ ( ای ٹی ای او ایس ) ءَ مرچی بولان ءِ ھند مچ ، شورکنڈ ءَ زورگریں پاکستانی لشکر ءِ کاروان ءَ ھواریں گاڑی یے گوں چیرکرتگیں شورھاں نشانگ کرتگ ، بمب تراک ءِ آسر ءَ زورگریں لشکر ءِ سروگان تارک اِمران ءُ سوبیدار اُمر پاروک ءَ ھوار درس دوازدھیں کارمند مرتگ اَنت ھمے وڑ ءَ دژمنیں لشکر ءِ گاڑی سرجم ءَ تباه بیتگ۔
جارکش ءَ گوشتگ که بی ایل اے ءِ سرمچاراں دگه یک کارے ءَ گوستگیں روچ ءَ کیچ ءِ ھند کلگ تگران ءَ نیمروچ ءِ ادار دو ءُ چل ءِ نزیک ءَ زورگریں پاکستانی لشکر ءِ بمب درگیجوکیں ٹولی ھما وھد ءَ گوں چیرکرتگیں شورھاں نشانگ کرتگ که آ بمب درگیجگ ءَ بیتگ اَنت ، تراک ءِ آسر ءَ دژمنیں لشکر ءِ دو کارمند مرتگ۔
جیھند بلوچ ءَ گوشتگ کہ بی ایل اے ءِ ڈنیانی پراکسی گوشوکیں باڑھی کشندہ، پاکستانی لشکر وت چین ءِ باپاری ءُ ناشریانی کمک کنوکیں باڑھی سلاہ بندیں ٹولی یے، برے بندرگاھانی پھازدار، برے راھداریانی چاروک، برے وام دیوکانی وشنود کنوک بنت۔ ھمے لشکر ھمک وھد ءَ مٹ بیوکیں بادشاھانی منشا ءِ ھساب ءَ دیم ءَ کن اَنت اے وڑ ءَ راجی نہ باپاری لشکر بنت، اے باڑھی کشندہ زوگریں لشکر ءِ سر ءَ بلوچ سرڈگار ءِ ھکی ئیں واھند سرمچارانی ارش گوں ترندی ءَ برجاہ بنت۔
