تربت: گوستگیں روچاں ڈنک ءَ گوں پاکستانی لشکر ءَ دیم پہ دیمی میڑ ءَ شھید بیتگیں بلوچ سرمچار شھید نبیل ھوت، امر زکا اللہ ءُ پیروزساربان ءِ جنازہ ءِ نماز مرچی گوگدانءِ مانشجاہ ءَ وانگ بیتگ۔
جنازہ ءِ نماز ءَ ھندی مردماں بازیں کچے ءَ بھر زرتگ کہ آیانی تہ ءَ جنین ءُ زھگ ھم بازیں کساسے ءَ گوں بیتگ اَنت۔ مانشجاہ ءَ اتکگیں مردمانی شھیدانی چیدگی مانشانی سر ءَ چادر تالان کرتگ ءُ پُل شانتگ، شھیدان ءَ ستک شانی ندر کرتگ۔
چوش کہ اے سے ئیں شھید بلوچ لبریشن آرمی ( بی ایل اے ) ءِ شھری چیرجنگی ءِ جنگول اَنت کہ 29 اپریل ءِ شپ ءَ ڈنک ءَ گوں زورگریں پاکستانی لشکر ءَ دیم پہ دیمی میڑ ءَ شھید بیتگ اَنت۔آیانی گون پاکستانی لشکر ءَ شپ ءِ سے ءُ نیم ءَ جنگ بندات بیتگ داں سھب ءَ بامگواہ ءَ جنگ برجاہ بیتگ اَت۔
بی ایل اے ءِ جارکش جیھند بلوچ ءَ وتی درشان ءَ شھید ستک شانی ندر کرتگ اَنت ءُ آیانی کرد ءُ دیمونی ساڑاتگ اَنت۔
شھیدانی لاشانی نہ دیگ ءِ بگیری ءَ کھولانی نیمگ ءَ داں سے روچ ءَ ڈی بلوچ ءَ سی پیک دگ ءَ زھرشانی برجاہ بیتگ اَت ءُ زورگریں لشکر ءَ شھیدانی لاش کھولاں نہ داتگ اَنت کہ آیاں دوشی وتی زھرشانی ھلاس کرتگ اَت ءُ مرچی آیانی جنازہ ءِ نماز ونتگ ءُ آیانی چیدگی مانش جوڑ کرتگ۔
