بلوچ آجوئی لشکر ( بی ایل اے ) ءَ نوشکے اُرش ءِ تامر چہ وتی رسانکدری تنک جاہ ” ھکل چینل“ ءَ شنگ کرتگ۔ سے دمان ءِ تامر ءَ بی ایل اے ءِ سرمچار گوں نوکیں سلاھاں وتی نشانگ ءِ نیمگ ءَ روگ ءَ گندگ بنت۔
نوشکے سلتان کنڈگ ءَ اُرش ءِ تامر ءَ گندگ بیت کہ بی ایل اے ءِ جنگولاں شھدگ ءِ سر ءَ سنگر گپتگ ءُ گوں مھکمیں شوربندی ءَ گاڑیاں دارگ ءُ پٹ ءُ پول کنگ ءَ اَنت۔
ھمے تامر ءَ دیمتر ءَ گندگ بیت کہ پاکستانی لشکر ءِ پانگس چہ بی ایل اے ءِ سرمچارانی اُرش جاہ ءَ باز نزیک اِنت۔ بلوچ سرمچار گاڑی ءُ مردمانی پٹ ءُ پول کنگ ءِ میان ءَ ھمے نشانیں مساپر بساں دار اَنت۔
اے درگت ءَ دگہ چم دستیں مردمے ءِ گوشگ اِنت کہ بی ایل اے ءِ جنگولاں دگہ شش پنجاپ ءِ جاہ منندیں مردم دیستگ بلے آ تاوان نہ داتگ اَنت۔
اے اُرش ءِ زمہ واری بلوچ آجوئی لشکر ( بی ایل اے ) ءِ جارکش جیھند ءَ منّ اتگ ءُ گوشتگ کہ بی ایل اے ءِ اسپیشل ٹیکٹیکل آپریشنز اسکواڈ (ایس ٹی او ایس) ءِ ٹولی ءَ نوشکے ءِ شھر ءَ سے کلومیٹر دور شھدگ ءَ سلتان کنڈگ ءَ دگ بستگ ءُ گاڑی پٹ ءُ پول کرتگ اَنت۔ بلوچ سرمچاراں اے دگ چہ بی ایل اے ءِ انٹیلیجنس ءِ ھال ءِ دیگ ءَ بستگ۔ سرمچاران ءَ ھال دیگ بوتگ کہ پاکستانی چیریں ادارھانی کارمند بسانی سر ءَ گوں سادگیں پوشاکاں سپر کنگ ءَ اَنت۔ اے میان ءَ داں سے اداراں شھدگ سرجم ءَ بند کنگ بوتگ۔ دگ ءِ بند کنگ ءِ میان ءَ جتائیں کوچ داشتگ ءُ پٹ ءُ پول کرتگ اَنت۔ اے میان ءَ سرمچاراں چہ یک بسے ءَ نو شکی ئیں مردم دزگیر کرتگ۔ پٹ ءُ پول ءَ پد چہ ھمے مردماں بازیں کچے ءَ پجار کارڈ ءُ بازیں کچے ءَ سم کارڈ دست کپتگ۔ آیان ءَ چہ چیریں ادارھانی کارمند بوگ ءِ پچارگ ءَ پد سرمچاراں جاھی کشتگ۔
آئی ءَ دیمتر ءَ گوشتگ کہ ھمے میان ءَ بی ایل اے ءِ سرمچارانی دگہ یک ٹولی یے ءَ ریلوے ٹریک گوں تراکناکیں شورھاں تباہ کرتگ۔ ھمے وڑ ءَ نوشکے ءَ کیسار نالی ءَ برجاھیں پاکستانی لشکر ءِ بنجل ءُ سلاھانی جاہ ءَ راکٹ لانچر ءُ آدگہ وتکاریں سلاھانی گون ءَ اُرش کرتگ۔ اے اُرش داں بیست دمان ءَ برجاہ بوتگ، چہ ایشی ءَ دژمنیں لشکر ءَ بازیں کچے ءَ مالی ءُ جانی تاوان بوتگ۔
