بلوچ نیشنل موومنٹ ( بی این ایم ) ءِ جارکش ءَ وتی شنگ کرتگیں درشانے ءَ گوشتگ کہ پکائیں بنشونے ءِ رد ءَ شال نادراھجاہ ءِ مردگ جاہ ءَ چہ پاکستانی لشکر ءِ نیمگ ءَ بازیں کچے ءَ لاش آرگ بیتگ اَنت۔ آیانی کچ پنجاہ گوشگ بوگ ءَ اِنت کہ آ تیر جنگ ءُ کشگ بیتگ اَنت، چہ مردگجاہ ءَ جاہ نہ بوگ ءِ سوب ءَ لاش یکے دومی ءِ سر ءَ ایرکنگ بیتگ اَنت۔
آئیءَ گوشتگ کہ اے جاور سکا بژنیگ کنت، بنشون ءِ گوشگ اِنت کہ اے زور بیگواھیں مردمانی لاش اَنت کہ پاکستانی لشکر ءِ بندیگ بیتگ اَنت ءُ بندیگی ءِ جاہ ءَ کشگ بیتگ اَنت۔
جارکش ءَ گوشتگ کہ گوں انسانی ھکانی گلاں لوٹ کن ایں کہ آ زوت پہ اے لاشانی پجار کناھینگ ءَ گامگیج بزور اَنت ءُ پاکستان سرکار ءَ زور بہ دے اَنت کہ اے لاشاں گوں شرپ ءَ پیش بہ کنت ءُ کھولاں وتی آزیزانی لاشاں گوں مھذب ءُ ربیتانی بنیاد ءَ گلزمین ءِ میار کنگ ءِ موکل ءَ بہ دے اَنت۔
آئی ءَ گوشتگ کہ اے ویل ناھکیں انسانی ھکانی بگیریاں پاشک کنت، انوگیں روچاں کیچ ءَ بلوچ سرمچارانی شھیدی ءَ پد آیانی لاش پاکستانی لشکر ءَ دستیگ کرتگ اَنت ءُ چہ کھولانی زھرشانی کنگ ءَ پد ھم آیانی لاش دیگ نہ بیتگ اَنت۔ اے وڑیں کارپد ریاست ءِ ناشریں چھرگ ءَ گیش پدر کنت۔چہ زوریں بیگواھی ءُ بندیگیں مردمانی کوش ءَ بلوچ راجی زرمبشت دارگ نہ بیت۔
آئی ءَ گوشتگ کہ پاکستانی لشکر ءِ نیمگ ءَ بھارت ءِ گون ءَ جنگ ءِ سان ءِ پیش کنگ ءُ پنجاپ ءَ جنگی جاورے ءِ ودی کنگ، راستی ءَ بلوچستان ءَ لشکری کاروائی ءُ کشت ءُ کوش ءِ تیز کنگ ءِ شوربندی ءِ بھر اِنت۔ چہ ایشی ءَ ھمے پدر بیت آئی تچکیں نشانگ بلوچ راج اِنت۔
