اسلام آباد ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءِ سروک ڈاکٹر ماہ رنگ ءَ ماں چاگردی رسانکدر ایکس ءَ وتی کلوھی تامربندے ءِ سر ءَ نبشتگ کہ من ھما درسیں ھندانی مردمانی گوں دل ءِ جھلانکیاں منت واریں کہ آیاں وتی شھرانی تہ ءَ گوستانی زھرشانی کرتگ ءُ اے جھد ءَ توانمند کرتگ، بلوچ چکچینی ءِ بگیری ءَ اے زرمبشت ءِ تہ ءَ وتی کرد پیلو کرتگ۔
آئی ءَ گوشتگ کہ ما اے گپ ءَ باز دلجمیں زرمبشت ءِ راستیں زور لّس مردم اَنت، مردمانی کمک ءُ ھوار بوگ ءَ اَبید زرمبشت نہ مان اَنت، مردمانی تہ ءَ پرک کنگی نہ اِنت مرد ءُ جنینانی یکجاھی ءَ ھوار بوگ ھژدری اِنت۔ انچوش کہ اے زرمبشت ءَ بلوچ جنینانی ھزارانی کچ ءَ ھوار بوگ ءَ اے زور گیش کرتگ ھمے وڑ ءَ گوں بلوچ راج ءِ درسیں جنیناں لوٹ کن آں کہ آ گیش ءَ چہ گیش بازیں کچے ءَ اے زرمبشت ءَ بھر زورگی اِنت۔
ڈاکٹر ماہ رنگ ءَ گوشتگ کہ من گوں باسمائیں مردماں ھمے لوٹ ءَ کن ایں کہ باند ءَ گڈانی، منگچر، گْوادر، تمپ، پسنی، دشت ءُ ھورماڑہ ءَ بہ اوکیں زھرشانیاں شریں وڑے ءَ بھر بزور اَنت۔
