بلوچ یکجھتی کمیٹی ءِ جارکش ءَ گوشتگ کہ بلوچستان ءَ ریاستی لشکر زوراکیانی درسیں سیمسراں گواز کنگ ءَ اِنت۔ زور بیگواھیں مردمانی کھولاں گوں جتائیں پیماں سسائی آزار دیگ ءَ اِنت۔ ھمک روچ زوریں بیگواھیانی بگیری ءَ زھرشانی کنوک دگانی سر ءَگران کنگ بنت، کمیشن ءِ نام ءَ زوراکی کنگ، پہ چاریگیءُ راجدروئی ءَ مردمانی ترسینگ، زر گرگ ءُ گس ءُ جاھاں وتی نام ءَ کناھینگ ءِ وڑیں میارباری چوش کہ سرجمیں بلوچستان ءَ زور بیگواھیں مردمانی کھولانی گون ءَ یکشل ءَبوگ ءَ اِنت۔
آئی ءَ گوشتگ کہ نوں یک نوکیں ویلے مشکے ءِ ھند تنک ءَ یکیں کھول ءِ سے مردم سجاد آزم، ولی جان نزیر ءُ ھاسل ءِ زوریں بیگواھی ءَ پد وھدے کہ کھول ءَ آیانی زوریں بیگواھی ءِ بگیری ءَ زھرشانی ءِ میار ءَ بیھار دیگ ءُ گس ءِ آدگہ مردیناں ھمک روچ بنجل ءَ لوٹائینگ ءُ کارگرگ ءَ اِنت۔ برے آیاں گوں وت ءَ لشکری تر ءُ گرد ءَبارت، برے آیاں پانگسانی دیوالانی بندگ ءَ پرمائیت، برے آپ ءِ آرگ ءَ پرمائیت۔ چہ ریاستی اے زوراکیانی سوب ءَ اے کھول سکا جنجالانی دیمپان اِنت۔ آ پہ ھشکیں نان ءَ چمدار اَنت پمیشکا کہ اے کھول ءِ مردیں ھمک روچ کار ءَ رو اَنت۔
آئی ءَ گوشتگ کہ بلوچ یکجھتی کمیٹی مردمی ھکانی گلاں ھوار گوں ھم بھرگ ءَ سیادی داروکیں مردماں لوٹ کنت کہ ریاستی زوراکیانی بگیری ءَ توار چست بہ کن اَنت۔ مردمی ھکانی ادارھاں اے وڑیں میار باری ءِ گرگ ءُدار کنگ ءَ گامگیج زورگ لوٹ ایت۔
