ھاران: جنکانی وانشجاہ ءَ زورگریں پاکستانی لشکر ءِ نیمگ ءَ پانگس جنگ ءِ بگیری ءَ جنکیں نودربراں زھرشانی کرتگ ءُ ریڈ زون ءَ نشتگ اَنت۔
نودربراں زھرشانی جاہ ءَ وانشجاہ ءَ پاکستانی لشکر ءِ پانگسانی دور کنگ ءُ انساپ ءِ لوٹ ءَ اوگام جتگ۔
آیاں تران کرتگ ءُ گوشتگ کہ جنکانی وانشجاہ ءَ پاکستانی لشکر ءِ نیمگ ءَ پانگ جنگ راجی دودمان ءِ بگیری اِنت ءُ وانشجاہ ءِ دستیگ کنگ ءِ پندل اِنت۔ ایشی ما ایر جن ایں ءُ زوت پانگسانی چست کنگ ءِ لوٹ ءَ کن ایں۔
آیانی گوشگ اِنت کہ مارا ھمے گپ گوشگ بوگ ءَ اِنت کہ اے پانگس پہ نودربرانی پھازداری ءَ جنگ بوتگ اَنت، بلے ما سرپد بہ ایں اے پہ پھازداری ءَ نہ بلکیں پہ دلسیاہ کنگ ءَ جنگ بوتگ اَنت۔
آیانی گوشگ اِنت کہ پانگس ءَ کیمرہ ھم جنوک اِنت پیسر ءَ جنکیں نودربرانی تامربند اِش شنگ کرتگ اَنت ما چوں سدک بہ بہ ایں کہ اے پانگساں پہ مئے پھازداری ءَ جنگ ءَ اَنت۔ دانکہ چہ پاکستانی لشکر ءِ نیمگ ءَ پانگس چست کنگ نہ بوتگ اَنت ما وتی زھرشانی ءَ برجاہ دار ایں۔
