بلوچ وومن پورم ءَ بلوچستانءُ کراچی ءَ زالبول ءُ جنکانی درکانودی زوریں بیگواھی ءِ سر ءَ بژن درشان کرتگ ءُ گوشتگ کہ لھتیں روچانی میان ءَ کم چہ کم چار زالبول چہ گس ءُ ھاسٹل ءَ آوار جنگ ءُ بیگواہ کنگ بوتگ۔ آیانی تہ ءَ ھسینہ بلوچ ء نوربکش آواران ءِ جاہ منند اِنت چہ کراچی ءِ نیول ءَ گس ءَآوار جنگ بوتگ، گل بانوک ء تاج مھمد چہ کیچ سنگ آباد، سمینہ بلوچ ء دوست مھمد چہ اورناچ ءُ نرسنگ ءِ نودربر ھدیجہ بلوچ ھوار اَنت۔
آئی ءَ گوشتگ کہ بلوچستانءَ گوستگیں دو دھک اِنت انسانی ھکانی لگتمالی برجاہ اِنت۔بلے انوگیں زالبولانی نشانگ کنگ سکا بژنیگیں تباھی یے پیش دارگ ءَ اِنت۔ زوریں بیگواھی، میان استمانی انسانی ھکانی راھبند، آئین ءِ پھازداری ءُ کانود ءِ لوٹانی تچک ءَ بگیری اِنت۔
آئیءَ گوشتگ کہ بلوچ وومن پورم ھمے زور دنت کہ اے وڑیں گامگیج چاگرد ءَ بے پھریزی ءُ بے بیسھی ودی کنت، پہ چاگرد ءِ ھمگرنچی ءَ داں دیر ءَ برجاھی ءَ تاوان دنت۔
بلوچ وومن پورم ءَ لوٹ کرتگ ءُ گوشتگ کہ زوریں بیگواھیانی درسیں ویلانی بابتءَ پٹءُ پول کنگ بہ بیت، زور بیگواھیں مردم زوت آجو کنگ بنت یا کانود ءِ رد ءَ آمیدگس ءَ پیش کنگ بہ بنت۔ ایشی زمہ وار ڈیھءُ میان استمانی کانود ءِ رد ءَ جست گرگ بہ بنت۔ پہ سانمندیں کھولانی ھکانی پھریزگ ءَ دلجمی دیگ بہ بیت ءُ آ ھچ وڑ ءَ ترسینگ مہ بنت۔
آئیءَ گوشتگ کہ بلوچ وومن پورم ھمے کھول ءَ کنت کہ آ پہ بلوچ زالبولانی ھک،انساپ ءُ انسانی شرپ ءِ پھریزگ ءَ توار چست کنت ءُ اے بابتءَ درسیں ھندیءُ میان استمانی پورماں وتی کرد ءَ پیلو کنت۔
بنشون: درشان اکس: مونوگرام
