جینوا ءَ وائس پار مسنگ پرسنز آپ سند یورپ چیپٹر ءَ اکوام متھدہ ءِ کارگس ءِ دیم ءَ زھرشانی کرتگ ءُ چہ سند ءَ پاکستانی پوج ءِ دست ءَ پہ زور بیگواھیں مردمانی آجوئی ءَ لوٹ کرتگ۔
اے زھرشانی ءِ سروکی کوآرڈینٹر سارنگ سندی ءُ ڈپٹی کوآردینٹر سئید سندی ءَ کرتگ۔ زھرشانی کنوکیں مردماں بینر دستاں بوتگ ءُ آیانی سر ءَ لوٹ نبشتہ بوتگ اَنت ءُ آیاں سند ءَ برجاھیں انسانی ھکانی بابت ءَ سرپدی داتگ۔
آیاں گوشتگ کہ گوستگیں بیست ءُ پنچ ءُ بیست ءُ شش سال اِنت کہ سند ءَ انسانی ھکانی گنتریں وڑے ءَ لگتمال کنگ بوگ ءَ اِنت۔ مردم ترس آماچ کنگ بوگ ءَ اَنت ءُ کم چہ کم دہ ھزار ءَ گیش مردم زور بیگواہ کنگ بوتگ کہ آیانی تہ ءَ گیشتر سیاسی ءُ انسانی ھکانی کارکن اَنت۔ مرچی ھم سدانی کچ ءَ مردم بیگواہ اِنت۔
آیاں گوشتگ کہ مردم چہ دگ، مچی ءُ گاڑیانی سر ءَ سپر ءِ میان ءَ ھم درکانودی آوار جنگ ءُ بیگواہ کنگ بوگ ءَ اَنت۔ کھول چہ سالاں پہ وتی آزیزانی آجوئی ءَ زھرشانی کنگ ءَ اَنت ءُ آیاں ھچ وڑیں سرپدی دیگ ءَ نہ اَنت۔
آیاں گوشتگ کہ بازیں بیگواھیں مردمانی لاش دزکپتگ اَنت کہ آیانی لاشانی سر ءَ آزارانی ٹپ ھم گندگ بوتگ اَنت۔
زھرشانی کنوکاں گوشتگ دانکہ گوں سند ءِ مھلوک ءَ انساپ کنگ نہ بوتگ ما وتی جھد ءَ برجاہ دار ایں ءُ میان استمانی ھمک پورم ءَ توار چست کن ایں۔
بنشون: درشان اکس: رسانکدر
