وائس پار مسنگ پرسن آپ سند ( وی ایم پی ایس ) یورپ چیٹر ءَ کراچی ءَ آئید ءِ روچ ءَ پرایمنیں زھرشانی ءِ سر ءَ پولیس ءِ بیڑ برگ ءُ زھرشانی کنوکانی درکانودی دزگیری ایر جتگ۔
کوآرڈینیٹر سارنگ سندھی اور ڈپٹی کوآرڈینیٹر سئید سندھی ءَ وتی ھواریں درشانے ءَ گوشتگ کہ وائس پار مسنگ پرسن آپ سند ءِ نیمگ ءَ ھمک آئید ءَ پرایمنں زھرشانی کنگ بیت دانکہ سند ءِ سیاسی کارکنانی زوریں بیگواھی دیم ءَ آرگ بہ بیت ءُ پہ آیانی آجوئی ءَ لوٹ کنگ بیت۔ اے سال ءَ ھم 21 مارچ 2026 ءَ کراچی پریس کلب ءِ دیم ءَ یک پرایمنیں زھرشانی گدانے جنگ بوتگ۔
آیاں گوشتگ کہ زھرشانی کنوک گوں پر ایمنی ءَ مچ بوتگ اَنت کہ پولیس کارمند ءُ سادگ پوشاکیں مردماں گدان ءِ سر ءَ ارش کرتگ۔ زھرشانی کنوک آزار داتگ اَنت، ترسینتگ اَنت ءُ درکانودی دزگیر کرتگ اَنت۔
آئی ءَ گوشتگ کہ دزگیر بوتگیں مردمانی تہ ءَ سورٹھ لوھار ءُ آئی سے سالی جنک بھومی، ایڈوکیٹ پرور آزاد، ایڈوکیٹ شمس چانڈیو، زور بیگواھیں پٹان ھان زھرانی ءِ لوگبانک بشیران زھرانی، آئی بچک پرمان زھرانی ءُ آدگہ مردم ھوار اَنت۔ دزگیر بوتگیں مردم درکشان پولیس اسٹیشن ءَ برگ ءُ آیانی سر ءَ دروگیں کیس جنگ بوتگ۔
آئی ءَ گوشتگ کہ اے ویل انسانی ھکانی بگیری اِنت ءُ پہ انساپ ءَ جست بوتگیں توار ءِ دارگ ءِ جھد اِنت۔
بنشون: درشان اکس: مونوگرام
