بلوچ وومن پورم ءِ سروک ڈاکٹر شلی بلوچ ءَ وتی درشانے ءَ گوشتگ کہ بلوچ کھول پہ وتی آزیزانی آجوئی ءُ بلوچ یکجھتی یکجھتی کمیٹی ءِ سروکانی زوتیں یل کنگ ءَ اسلام آباد پریس کلب ءِ دیم ءَ یکشل ءَ زھرشانی ءَ نشتگ اَنت۔ گوں آیاں گپ ءُ تران کنگ ءُ آیانی لوٹانی منّگ ءَ ابید ریاستی ادارہ گوں آیاں جتائیں رویشاں پیش بوگ ءَ اَنت۔ وتی درسیں زوراں پہ آیانی زھرشانی ءِ ھلاس کنگ ءَ چکاسگ ءَ اَنت ءُ دور دارگ ءَ اَنت۔
آئی ءَ گوشتگ کہ بلوچ کھولانی تہ ءَ پیرزالیں مات ءُ کسان سالیں زھگ ھم ھوار اَنت چہ وتی آزیزانی بیگواھی ءَ سکا پریشان اَنت آیانی آزیز ریاست ءِ درکانودی آزار جاھاں بندیگ اَنت۔ آیانی لوٹ بلکل ھک ءُ ریاستی کانودانی رد ءَ اَنت، بلے چے ریاست آیانی پسو ءَ گوں جوانیں رویشت، ھک، کانود ءُ شرپ ءَ دیگ ءَ اِنت۔ اگاں بلوچان ءَ ھمے رویشت اوپار کنگی اِنت گڑا چی ءَ آیان ءَ تچک ءَ نہ گوش اَنت کہ بلوچ پہ وتی جیڑہ ءِ گیش ءُ گیوار ءَ اسلام آباد ءِ نیمگ ءَ چماں ھم چست مکن اَنت۔
ڈاکٹر شلی بلوچ ءَ گوشتگ کہ من یکبرے پد ءَ گوں سرکار ءَ لوٹ کن آں کہ اے جیڑہ ءَ گوں سنگینی ءَ بہ چار ایت ءُ ھما مات ءُ زھگ چہ بلوچستان ءَ اتکگ اَنت آیانی گپاں گوش بدار ایت۔ اگاں آ وتی ھمے رویشت ءَ برجاہ دار اَنت گڑا بلوچستان ءَ ودی بیوکیں بے بیسھیانی زمہ وار وت اَنت۔
