بلوچ نیشنل موومنٹ ءِ انسانی ھکانی ادارہ پانک ءَ پاکستانی پوج ءِ دست ءَ سئید اھمد ء شاھو ءُ اجمل بلوچ ء یاسین ءِ آوارجنی ءَ پد درکانودی کوش ایر جتگ۔
پانک ءِ رد ءَ سئید اھمد 9 دسمبر 2025 ءَ پاکستانی پوج ءَ چہ گوادر ءِ ھند پانوان ءَ آوار جتگ ءُ بیگواہ کرتگ ءُ اجمل بلوچ 21 اگست 2025 ءَ چہ گوادر شھر ءَ پاکستانی پوج ءَ آوار جتگ ءُ بیگواہ کرتگ۔
آئی گوشگ اِنت کہ دوئیں مردم آوار جنیءَ پد داں باز وھد ءَ بیگواہ کنگ بوتگ اَنت۔ سئید اھمد چار ماہ ءُ اجمل بلوچ داں نُھ ماہ ءَ بیگواہ کنگ بوتگ۔ اے میان ءَ نہ آمیدگس ءَ پیش کنگ بوتگ اَنت ءُ نہ آیانی بابت ءَ سرپدی دیگ بوتگ۔
پانکءَ گوشتگ کہ دوئیں بیگواھی ءَ پد 3 مئی 2026 ءَ بندیگجاہ ءَ درکانودی کشگ بوتگ اَنت۔ آیانی تیرسپتگیں لاش گوادر ءِ ھند پسنی، نلیٹ ءَ چگل دیگ بوتگ اَنت، اے انسانی ھکءُ کانود ءِ لوٹانی تچکیں بگیری اِنت۔
بنشون: درشان اکس: پانک
