بلوچ لبریشن آرمی (بی ایل اے) ءِ جارکش جیھند بلوچ ءَ گوشتگ کہ بی ایل اے ءِ سرمچاراں کلات، مند ءُ بولان ءَ چار جتاھیں کاروائیاں زورگریں پوج ءُ آئی راشن بروکیں گاڑی نشانگ کرتگ اَنت ءُ مزنیں شھدگ باز اداراں بستگ۔
آئی گوشتگ کہ گوستگیں روچ ءَ کلات ءِ ھند شیکڑی ءَ بی ایل اے ءِ سرمچاراں زورگریں پوج ءِ پیادگیں کارمند ھما وھد ءَ سنگر گپتگ ءُ نشانگ کرتگ اَنت کہ آ یک روچے پیش سرمچارانی اُرش ءَ تباہ بوتگیں گاڑی ءِ نزیک ءَ آتکگ اَنت۔ اے کاروائی ءَ زورگریں پوج ءِ یک کارمندے جاھی مرتگ ءُ دو ٹپی بوتگ۔
آئی گوشتگ کہ دوشمبے ءِ روچ ءَ کلات ءِ ھند مکئی ءَ بی ایل اے ءِ سرمچاراں زورگریں پوج ءِ پیادگ ءَ تر ءُ گرد کنوکیں کارمند گوں تراکناکیں شورھاں نشانگ کرتگ اَنت۔ چہ ایشی آسر ءَ یک کارمندے مرتگ ءُ یکے ٹپی بوتگ۔
جارکش ءَ گوشتگ کہ گوستگیں شپ ءَ سرمچاراں بولان ءِ ھند بی بی نانی ءَ مزنیں شھدگ داں دو اداراں گیش بستگ ءُ گاڑی پٹ ءُ پول کرتگ اَنت۔
آئی گوشتگ کہ 11 ستمبر ءَ کیچ ءِ ھند مند ءَ بی ایل اے ءِ سرمچاراں پہ زورگریں پوج ءَ راشن بروکیں گاڑی گوں راشناں ھوار گپتگ۔ گاڑی ءِ ڈرائیور سرمچارانی دست ءَ اِنت ءُ جست ءُ پرس برجاہ اِنت۔
جیھند بلوچ ءَ درشان ءِ گڈی ءَ درسیں اُرشانی زمہ واری من اِتگ۔
