بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ گوشتگ کہ 22 جون ءَ بی ایل ایپ ءِ سرمچار گریشگ ءَ گل ءِ کارے ءَ ترءُ گردے ءَ بیتگ اَنت کہ بدرنگ ءَ ریاستی سروکی ءَ جوڑ بیتگیں کشندہ ٹولی ءِ کارمندانی گون ءَ دیم پہ دیم بیتگ اَنت کہ یک ترندیں میڑے بندات بیتگ چہ ایشی گل ءِ سے سرمچار شھید بیتگ، دژمن ءِ یک کارمندے مرتگ ءُ باز ٹپی بیتگ۔
آئی ءَ گوشتگ کہ میڑ ءَ شھید بیتگیں سرمچارانی تہ ءَ سیکنڈلیپٹیننٹ مکبول بلوچ پنام کندیل بلوچ، سراج بلوچ پنام زبیر بلوچ ءُھالد بلوچ پنام سپر بلوچ ھوار اَنت۔
جارکش ءَ گوشتگ کہ شھید سیکنڈ لیپٹیننٹ مکبول بلوچ پنام کندیل ء نوشیروان گریشگ جاورجی ءِ جاہ منند اِنت۔ آ یک وانندگیں ورنایے ءُ نیشنل یونیورسٹی آپ ماڈرن لینگویجز ( نمل ) اسلام آباد ءَ ونتگ۔ ریاستی ادارھاں 2021 ءَ زور بیگواہ کرتگ ءُ داں ھپت ماہ ءَ ریاستی چیریں آزارجاھاں بندیگ بوگ ءُ آزارانی اوپار کنگ ءَ پد یل بیتگ۔ یل بوگ ءَ پد آ 2022 ءَ پہ بلوچ سرڈگار ءِ آجوئی ءَ بی ایل ایپ ءَ ھوار بیتگ۔ کسانیں وھدے ءَ چہ وتی لیکھی بودناکی، گوں گل ءَ ھمگرنچی لشکری بودناکیاں یک جوانیں سرمچارے ءِ دروشم ءَ دیم ءَ آتکگ۔
آئی گوشتگ کہ آ کیلکور، گچک، مشکے، جاھو، وڈ، اورناچ ، نال ءُ گریشگ ءَ بازیں ھنداں آپریشناں ھوار بیتگ۔ چہ آئی زانشت ءُ دیمونیانی سوب ءَ گل ءَ آئی ءَ ” کربان یونٹ ” ءَ ھوار کرتگ کہ آ گل ءِ یک گچین ءُ ستک داروکیں ٹولی یے۔
جارکش ءَ گوشتگ کہ شھید سراج بلوچ پنام زبیر ء دولت ھان باھڑی گریشگ ءِ جاہ منند اِنت۔ 2020 ءَ آ زور بیگواہ کنگ بیتگ بلے چہ آجوئی ءَ پد آئی لیکھی ھمگرنچی ءِ تہ ءَ ھچ وڑیں کمی نہ بیتگ۔ آ یک سالے ءَ پیش بی ایل ایپ ءَ ھوار بیتگ ءُ کسانیں وھدے ءَ آئی بازیں گچینیں مشنانی تہ ءَ جوانیں کرد پیلو کرتگ۔
آئی ءَ گوشتگ کہ شھید ھالد بلوچ پنام سپر بلوچ ء مھمد بکش گریشگ گیشتری ءِ جاہ منند اِنت۔ آ 2020 ءَ داں لھتیں ماہ ءَ زور بیگواہ کنگ بیتگ۔ آجوئی ءَ پد آئی راجی زرمبشت ءَ جوانیں کرد ءِ پیلو کنگ ءِ کول کرتگ ءُ سالے ءَ پیش بی ایل ایپ ءَ ھوار بیتگ۔
جارکش ءَ گوشتگ دوئیں ھمبلاں جاھو، اورناچ ، نال ءُ گریشگ ءَ جوانیں جنگاں پارٹی ءِ لشکری آپریشناں گوں توکل ءُ ایمانداری ءَ شریں وڑے ءَ کرد پیلو کرتگ۔
میجر گھرام بلوچ ءَ گوشتگ کہ بی ایل ایپ اے گرانکدریں پسگاں دروت ندر کنت کہ آیاں پہ بلوچ سرڈگار ءِ آجوئی ءِ مول ءَ وتی جانانی دیمونی داتگ۔ آیانی دیمونی مئے راجی سپر ءِ روکیں چراگ اَنت کہ آیانی کاروان ءَ برجاہ دار ایں۔
