بلوچ یکجھتی کمیٹی ءِ سروک سمی دین بلوچ ءَ شال ءَ پولیس ءِ تیرگواری ءَ مھمد ھالد ءِ کوش ءِ بابت ءَ وتی درشان ءَ گوشتگ کہ اے تھنا یک درکانودی یے نہ اَنت، بلکیں جنگل ءِ کانود اِنت کہ اود ءَ آئین ءِ لاش ءِ سر ءَ سلاہ بند چو رستر ءِ پیم ءَ ناچ کنگ ءَ اَنت۔ بلوچستان ءَ ریاست ءَ کشندھان ءَ پوشاک گور ءَ داتگ ءُ آیان ءَ وتسر کرتگ کہ کسے ءَ دل لوٹ ایت بجن اِت، آوار بہ جن اِت ءُ پد ءَ ھمےزوراکی ءَ ایمنی ءِ نام دیگ بہ بیت۔ اد ءَ نہ شھریانی جان ءُ شرپ پھریز اَنت ءُ نہ آیانی ھوناں دگہ نھادے ھست۔ پہ ناشرکاری ءِ گر ءُ دار ءِ نام ءَ ورنایانی کوش ءُ زوریں بیگواھی نوں یک پالیسی یے جوڑ بوتگ ءُ پہ سرکار ءِ کار تھنا میاربارانی نیمون دیگ پشت کپتگ۔
آئی ءَ گوشتگ کہ نوشکی ءِ جاہ منندیں ھالد یک نادراھے ءِ ھون دیگ ءَ شتگ ءُ چہ نادراھجاہ ءَ درکپتگ راہ ءَ ایگل اسکواڈ ءَ آئی ءَ رندگیری کرتگ ءُ تیر جتگ۔ یک بے میار ءُ کودکیں ورنایے ءِ میار تھنا انسانیت بوتگ۔ آئی لاش سرجمیں شپ ءَ داشتگ ءُ سھب ءَ کھول ءَ گوشگ بوتگ کہ بے تواری ءَ بہ بر اِت ءُ جست ءُ کوکار مکن اِت۔
سمی دین ءَ گوشتگ کہ اے ویلے نہ اِنت، تھنا یک ھپتگے ءَ شال ءَ ھمے ایگل اسکواڈ ءِ دست ءَ چار ورنا جنگ بوتگ۔ بلے نہ پسو ءُ نہ دگہ جست گرگ۔ بلوچستان سرکار ءِ پٹ ءُ پول ءِ ٹاپار ھمے لاشانی چیر ءَ کل اِنت۔ لھتیں روچ پیش یک ورنایے اسرار کلندرانی ھمے ایگل اسکواڈ ءِ بندیگ ءَ چار روچ ءَ پد آئی آزار داتگیں لاش نادراھجاہ ءَ سر کنگ بوتگ کہ ایشی وتکشی کرتگ۔وھدے اے کیس بلوچستان اسمبلی ءَ پیش کنگ بیت گڑا بلوچستان ءِ مزن وزیر آئی ءَ ناشری ءِ نام ءَ دنت ءُ اے جیڑہ ءَ ھلاس کنت۔
آئی ءَ گوشتگ کہ بلوچستان پہ زانت یک جنگ آماچیں دمگے جوڑ کرتگ ءُ پیش کنگ ءَ اَنت دانکہ ھمک کوش، زوریں بیگواھی ءُ زوراکی ءَ ھژدری نام بدے اَنت ءُ جائز پیش بہ کن اَنت۔ بلے راستی ھمیش اِنت کہ ھمے ریاستی زوراکی، درکانودی ءُ جست نہ گرگ ءِ آس ءَ مزن کنگ ءَ اِنت۔ بلوچ ءِ ھون ھما کچ ءَ ارزان بوتگ کہ ھمک روچ ھونریچی بوگ ءَ اِنت، ھمک رند ءَ ھمے کلوہ دیگ بیت کہ تئی زندگی ءَ ارزشت نیست۔ وھدے ھمے بلوچ ءِ بیسہ چہ ریاست ءَ ھلاس بیت گڑا آئی ناشرکاری ءِ نام دیگ بیت، چے زاناں زوراکی ءِ اوپار کنگ پرز اِنت ءُ آیانی بگیری ءَ گپ جنگ میارباری یے۔
سمی دین ءَ گوشتگ کہ کجام ھم چاگرد ءَ وھدے آئین ءُ کانود لگتمال کنگ بہ بیت، انساپ لوٹوک میاربار لیکگ بہ بنت، توار چست کنوک زندانی کنگ بہ بنت، تیر جنگ یا بیگواہ کنگ بہ بنت اود ءَ نابودی پشت کپ ایت، اے پہ زانت یک شوربندی یے جوڑ بنت۔ یک انچیں شوربندی یے ءِ رد ءَ سرجمیں راج ءَ گوں بے تواری ءَ ھلاس کنگ ءَ اَنت ءُ ھمے چکچینی بلوچستان ءَ چہ دھکاں برجاہ اِنت۔
بنشون: درشان اکس: دامگ
