شال: وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6134 روچ سرجم بوتگ کہ شال پریس کلب ءِ دیم ءَ برجاہ اِنت۔ مرچی زوربیگواھیں مھمود الی لانگو ءِ کھول گدان ءَ آتکگ ءُ زھرشانی کرتگ۔
مھمود الی لانگو ءِ مات گوں مھمود الی لانگو ءِ کسانسالیں زھگ ءِ ھواری ءَ گدان ءَ آتکگ ءُ گوشتگ کہ منی زھگ ءِ بیگواھی ءَ سالے ءَ گیش اِنت کہ داں مرچی ھم آئی بابت ءَ مارا سرپدی دیگ نہ بوتگ۔
آئی گوشتگ کہ ما انساپ ءِ لوٹگ ءَ آمیدگس ءُ آدگہ ادارھانی در ٹک اِتگ بلے ھمک بر ءَ من بے اوست کنگ بوتگ آں۔ اے دراجکشیں ودار ءَ مئے کھول سسائی جنجالانی دیمپان کرتگ۔
مھمود الی لانگو ءِ مات ءَ گوں سرکار ءَ لوٹ کرتگ کہ آ منی زھگ ءِ بابت ءَ من ءَ سرپدی بہ دئے اَنت ءُ پہ آئی آجوئی ءَ دلجمی بہ دئے اَنت۔ دانکہ مئے کھول ءِ جنجال کم بہ بنت۔
وی بی ایم پی ءَ وتی درشان ءَ گوشتگ کہ زوریں بیگواھی نہ تھنا راھبند ءُ کانود ءِ لگتمالی اِنت بلکیں اے انسانی ھکانی گنتریں بگیری اِنت۔ چہ اے رویشت ءَ ھزاراں کھولانی زندگی جنجال اِنت۔ سرجمیں چاگرد ءَ ترسے ودی کنگ بوتگ۔
گل ءَ گوں سرکار ءُ ریاستی ادارھاں لوٹ کرتگ کہ آ وتی راھبندی ءُ کانودی زمہ واریاں پیلو بہ کن اَنت ءُ اے جیڑہ ءَ انسانی ھمدردی ءُ کانود ءِ رد ءَ گیش ءُ گیوار بہ کن اَنت۔ زوریں بیگواھی ءُ در آمیدگسی گامگیج زوت ھلاس کنگ بہ بیت ءُ مھمود الی لانگو ءَ ھوار درسیں بیگواھیں مردم آجو کنگ ءُ آیانی کھولانی دست ءَ دیگ بہ بنت۔
آئی گوشتگ کہ چونیں ھم مردمے ءِ سر ءَ بھتام ھست گڑا آ راھبند ءِ رد ءَ آمیدگس ءَ پیش کنگ بہ بنت۔ دانکہ سرکار کانود ءِ رد ءَ دلجمی بہ دنت ءُ شھریانی بنکی ھکانی پھازداری ءَ کنت۔
بنشون: درشان اکس: وی بی ایم پی
