انسانی جھانی روچ ءِ دم ءُ درگت ءَ بیتگیں نیادے ءَ تْران کنان پانک ءِ راھوتکار ءُ بی این ایم ءِ بنجاھی باسک ھاتم بلوچ ءَ گْوشتگ ، چہ بلوچ ءَ زندگ بوگ ءُ سیاست کنگ ءِ ھک پچ گرگ بیتگ اَنت ءُ بلوچ ءِ زمین ءُ مڈی ’ مال ء گنیمت ‘ ءِ پیم ءَ بھر بانگ کنگ بیگ ءَ اَنت۔
بلوچ نیشنل موومنٹ ( بی این ایم ) ءِ نیمگ ءَ برجم دارگ بیتگیں اے نیاد ءَ بی این ایم ءِ شھید راشد ھنکین ، آواران ءِ باسکاں بھر زرتگ ۔ نیاد ءِ گچینی مھمان ھاتم بلوچ بوتگ۔ نیاد ءِ ھنکین ءِ کماش استاد مھران ، زْرمبش براھوئی ءِ شونکار ذیشان منان ءَ تْران کرتگ۔
ھاتم بلوچ ءَ دہ دسمبر ءِ پژدر ءِ بارہ ءَ گپ جنان ءَ گْوشتگ ھپتاد ءُ ھپت سال ءَ پیش دہ دسمبر انسانی ھکانی جھانی روچ منگ بیتگ۔ انسانی ھک ءُ انسانی ھکانی جھانی روچ ءِ پژدر ءَ اے گپ منگ بیتگ کہ درسیں مردم آجو ودی بیتگ اَنت ءُ درسانی ھک ءُ منگہ برابر اَنت۔ بلے چہ ما درسیں ھک پچ گرگ بیتگ اَنت۔
آئی ءَ گْوشتگ کہ مارا سیاست کنگ ءِ موکل نیست دژمن مئے سر ءَ ھرچ وڑیں زوراکی کنگ ءَ اِنت۔پاکستان ریاست ءَ وتی درسیں پندل مئے سر ءَ کارمرز کرتگ اَنت چوش کہ ملا، نشہ بھا کنوکاں بہ گر داں شپیک مینگل ، سمیر سبزل ءُ راشد پٹان ءِ وڑیں مردم کشاں کارگرگ ءُ بلوچ جھد ءَ ھرچ پڑ ءَ نشانگ کنگ ءِ جھد ءَ اِنت۔ بلے اے درس وڑے نا وڑے ءَ بے سوب بوتگ اَنت۔ پرچا کہ مئے سنگت پہ مردمی آجوئی ءُ برابری ءَ جھد کنگ ءَ اَنت۔
آئی ءَ گوشتگ کہ دژمن مئے بگیری ءَ جتائیں پروپیگنڈہ کنگ ءَ اِنت بلے من ءَ ستک اِنت کہ رزا ءُ کمبر ءِ وڑیں سنگت جھد ءَ ھوار بوتگ اَنت۔گلام مھمد ءِ وڑیں سنگت بوتگ اَنت پاکستان اے جھد ءَ پروش دات نہ کنت۔ مئے جھد الم روچے وتی منزل ءَ سر بیت۔ ما پمیشکا مڑگ ءَ ایں کہ ما وتی ھکاں پچ گپت بہ کن ایں۔ مئے جھد زوراکی ءِ پشت ءَ چست بوتگ پاکستان مئے زھگاں برگ ءَ اِنت، جنگ ءَ انت ، مئے گساں ماندارگ ءَ اِنت ءُ بلوچاں مچ ڈنڈ دیگ ءَ اِنت۔
ھنکین ءِ کماش استاد مھران ءَ گْوشتگ کہ جھان ءِ ھما ڈیھ کہ انسانی ھکانی سر ءَ گپ جن اَنت ھما چہ درساں گیش انسانی ھکاں لپاشگ ءَ اَنت۔ جھانی توان بلوچ ءَ مردم نہ لیک اَنت ، پرچا کہ نزور کسی چماں نہ اِت۔ ما گْوستانک ءَ بہ چاریں ما گند ایں کہ یک نیمگے ءَ پہ مردمگری ءُ زانت ءَ جھد بوتگ ءُ دومی نیمگ ءَ مردمگری ءِ بگیری ءَ جھانی واکانی شوندات بیتگ اَنت۔ گْورے مردنانی ھون ریچگ بیتگ ءُ دومی نیمگ ءَ پہ ایمنی ءُ انساپ ءَ گپ بیتگ۔
آئی ءَ گْوشتگ کہ بلوچستان ءَ انو ھمے وڑ بوگ ءَ اِنت۔ بلوچ پہ وتی راجی آجوئی ءُ وتواجھی،ایمنی ءُ انساپ ءَ جھد ءَ اِنت۔بلے دوھمی نیمگ ءَ پاکستان ءَ گوں ھوار جھانی توان چین ءُ امریکہ گوں مزن مزنیں شرکتاں پہ بلوچ ءِ چکچینی ءَ پاکستان ءَ ھرچ وڑیں کمک دیگ ءَ اَنت۔ بلوچ ءِ جیڑہ ءِ بارہ ءَ زانگ ءَ پد ھم امریکہ چارمی روچ ءَ پاکستان ءَ پہ ریکوڈک ءِ کارانی سوبمندی ءَ زر ءُ پیکج دیگ ءِ جار ءَ جنت۔ چہ ایشی ءَ زانگ بیت کہ امریکا ءُ چین مردمگری بگیری ءُ بلوچ ءِ چکچینی ءَ پاکستان ءِ مالی کمک کنگ ءَ اَنت۔
ذیشان منان ءَ تْران کنان ءَ گْوشتگ کہ وھدے انگریزاں دگہ راج چیردست ءُ آیانی ڈیھ دسیتگ کرتگ اَنت گڑا آ چہ وت ءَ کمتر لیک اتگ ءُ پیش داشتگ اَنت۔ مروچی زوراک گوں ما انچوش کنگ ءَ اَنت۔ گوں ما بیوکیں زوراکیاں جھانی واک ءُ انسانی ھکانی پانک سرپد اَنت۔ بیت کنت آ زوراکیں ریاست ءِ سر ءَ زور ھم بہ دے اَنت بلے اے زورگریں ریاست ھما کار ءَ کنت کہ گوں ایشی ءِ سیتاں بندوک اِنت۔
تْرانکاراں گْوشتگ ، بلوچستان ءَ انسانی جیڑہ گوں بلوچستان ءِ سیاسی جاوراں بندوک اَنت ، داں بلوچستان آجو بہ بیت چوشیں واکے نیست کہ آ پاکستان ءَ چہ اے زوراکیاں بہ دار ایت۔ بلے مئے چہ انسانی ھکانی گل ءُ جھان ءِ دگہ راجاں ھمے لوٹ اِنت کہ آ پاکستان ءَ ھمے چماں بہ چار اَنت کہ آ زوراک اِنت ءُ انسانی ھکاں لپاشگ ءَ اِنت۔
