شال ءَ وائس پار بلوچ مسنگ پرسنز ءِ زھرشانی گدانءَ شال پریس کلب ءِ دیم ءَ 6144 روچ سرجم بوتگ۔ مرچی گل ءِ چیئرمین نسراللہ بلوچ گدان ءَساڑی بوتگ۔
جتائیں بھرگاں سیادی داروکیں مردم پہ ھمدردی درشان کنگ ءَ گدانءَ اتکگ اَنت ءُ وتی زھرشانی یادشت کرتگ۔
نسر اللہ بلوچ ءَ تران کرتگ ءُ گوشتگ کہ زوریں بیگواھی انسانیت ءِ بگیری ءَ یک ٹوھیں میارباری یے۔ ھمک باسمائیں مردم ءِ سرءَ پرز بیت کہ اے وڑیں گامگیجانی بگیری ءَ توار چست بہ کنت۔
آئیءَ گوں سیاسی پارٹی، نودربر گل ءُ چاگرد ءِ ھمک بھرگ ءَ لوٹ کرتگ کہ آ زوریں بیگواھیانی بگیری ءَ یکجاہ بہ بنت ءُ توار چست بہ کن اَنت، دانکہ اے درچ دارگ بہ بیت ءُ پہ زور بیگواھیں مردمانی آجوئی ءَ دلجمی دیگ بہ بیت۔
بنشون: درشان اکس: وی بی ایم پی
