بلوچ نیشنل موومنٹ ( بی این ایم ) ءِ جارکش ءَ وتی شنگ کرتگیں درشانے ءَ گوشتگ کہ پارٹی ءِ کلانھیں لیکھی کارکن کھدہ اسمائیل 4 دسمبر 2025 ءَ بیران بوتگ۔ پارٹی آئی بیرانی ءَ ٹوھیں ویلے لیک ایت ءُ آئی مھکمی ارادھی، لیکھی ھمگرنچی ءُ جپاکشیاں آئی ءَ ستک شانی ندر کنت۔
آئی ءَ گوشتگ کہ کھدہ اسمائیل بلوچ نہ تھنا پارٹی ءِ پھر بندگی مڈی یے اَت بلکیں آ گوں بنکی ءُ ایمانداریں ھمبلاں ھوار اَت کہ آیاں بی این ایم لیکھی بنیاد ءَ دیم ءَ آورتگ ءُ ایشی پہ وتی ھند ءَ مھکم کنگ ءَ بے کساس جھد کرتگ۔
جارکش ءَ گوشتگ کہ اسمائیل بلوچ ءِ سیاسی زندگی راھبندانی پاسداری ءُ جھد ءِ زانشت ءِ چیدگ اِنت۔ چہ دژمن ءِ نیمگ ءَ یکشل ءَ زوراکی ءُ بیھاراں ابید آئی ءَ کدی چہ وتی پارٹی ءِ پرواگرام ءُ لیکہ ءَ پشت ءَ کنزگ ءِ بابت نہ جیڑ اتگ۔ آ وتی پیرانسری ءَ بی این ایم ءِ دیمروئی ءُ گل ءِ مھکم کنگ ءَ جوانیں کردے بوتگ۔ اے پارٹی ءِ گوستانک ءَ جوانیں درے لیکگ بیت۔
درشان ءَ دیمتر ءَ گوشگ بوتگ کہ پاکستان ءِ درسیں زوراکیاں ابید آئی لیکھی ھمگرنچی کدی ھم نزور نہ بوتگ، نہ آئی ارادہ نزور بوتگ۔ آ داں گڈی دم ءَ گوں پارٹی ءِ پروگرام، راجی آجوئی ءِ لیکہ ءُ وتی سوگند ءِ سر ءَ اوشتاتگ۔
جارکش ءَ گڈی ءَ گوشتگ کہ بی این ایم واجہ اسمائیل بلوچ ءِ کار ءُ دیمونیاں پہ مدامی گیر کار ایت۔ پارٹی آئی شرپ، مھر، جھد ءُ آئی ءِ شان ءَ ستک شانی ندر کنت ءُ ھمے سدکی ءَ دنت کہ پہ آئی لیکہ ءُ ھما آجوئی ءَ آئی ءَ وتی سرجمیں زند ندر کرتگ، ھما جھد ءَ گوں مھکم ءُ توکل ءَ دیم ءَ بر ایں۔
