وائس پار بلوچ مسنگ پرسنز ءِ چیئرمین نسر اللہ بلوچ ءَ جام مھمد کرد ءِ دومی بر ءَ زوریں بیگواھی ءِ سر ءَ بژن درشان کرتگ ءُ گوشتگ کہ اے گامگیج نہ تھنا کانود بلکیں پاکستان ءِ آئین ءُ بنکی انسانی ھکانی تچکیں بگیری اِنت۔
آئی ءَ گوشتگ کہ جان مھمد کرد ء ابدرھیم ءِ کھول ءَ گوں گل ءَ رھوت کرتگ ءُ گوشتگ کہ آ 13 اپریل ءِ شپ ءَ چہ شال ءِ ھند کلی لوڑ کاریز، برمہ ھوٹل ءِ نزیک ءَ چہ گس ءَ کھول ءِ دیم ءَ پاکستانی پوج ءَ آوار جتگ ءُ بیگواہ کرتگ۔ نہ دزگیری ءِ سوب ءَ گوشگ ءَ اَنت ءُ نہ آئی سلامتی ءِ بابت ءَ ھال دیگ ءَ اَنت۔
نسر اللہ بلوچ ءَ گوشتگ کہ چہ اے جاوراں کھول سکا سسائی آزار، ترس ءُ بے ستکی ءِ آماچ اِنت۔ کھول پہ وتی آزیز ءِ زندگی ءَ سکا ترسگ ءَ اِنت، چہ ایشی پیش جان مھمد کرد داں نھ ماہ ءَ زور بیگواہ بوتگ ءُ آجوئی ءَ پد یکشل ءَ نادراہ بوتگ۔
آئی ءَ گوشتگ کہ چونیں ھم شھری یے ءِ درکانودی، بے ارزی ءُ درآمیدگسی آوار جنگ نہ تھنا آئین ءِ آرٹیکل 9 ءُ 10 ءِ بگیری اِنت، بلکیں اے ریاستی ادارھانی کانودی زمہ واریانی ناپرمانی اِنت۔
آئی ءَ گوں بلوچستان آمیدگس ءِ جج ءَ لوٹ کرتگ کہ آ اے ٹوھیں جیڑہ درکانودی گامگیج ءِ سر ءَ دلگوش گور بہ کنت، ادارھاں جست بہ کنت ءُ پہ جان مھمد کرد ءِ زوتیں سلامتی آجوئی ءَ دلجمی دیگ ءَ گامگیج بزور ایت۔
نسر اللہ بلوچ ءَ گوشتگ کہ آمیدگس ءِ اے آئین ءُ اکلاکی زمہ واری اِنت کہ آ پہ شھریانی بنکی ھکاں دلجمی بہ دے اَنت، اے وڑیں گامگیج کانود ءِ واکداری ءَ نزور کنت۔
بنشون: درشان اکس: وی بی ایم پی