شال ءَ پہ زور بیگواھیں مردمانی پد جنگ ءَ وائس پار بلوچ مسنگ پرسنز ءِ زھرشانی گدان ءَ 6135 روچ سرجم بوتگ کہ شال پریس کلب ءِ دیم ءَ برجاہ اِنت۔
اے میان ءَ جتائیں بھرگاں سیادی داروکیں مردم گدان ءَ اتکگ اَنت ءُ زوریں بیگواھیانی بگیری ءَ توار چست کرتگ ءُ گوں کھولاں ھمدردی درشان کرتگ۔
اے بابت ءَ وی بی ایم پی ایگزیٹو کمیٹی ءِ باسک نیاز مھمد ءَ تران کرتگ ءُ گوشتگ کہ زوریں بیگواھی ءُ درکانودی کوش نہ تھنا آئین بلکیں انسانیت ءِ بگیری ءَ ٹوھیں میارباری یے۔ داں کدی مات، گھار ءُ زھگ پہ انساپ ءَ در پہ در بہ بنت۔
آئی ءَ گوشتگ کہ ما چہ سرکار ءَ لوٹ کن ایں کہ درسیں بیگواھیں مردم زوت آجو کنگ بہ بنت ءُ کسے ءِ سر ءَ بھتام ھست گڑا آمیدگس ءَ پیش کنگ بہ بیت۔
نیاز مھمد ءَ گوشتگ کہ ما پر ایمنیں جھد ءَ داں ھما وھد ءَ برجاہ دار ایں دانکہ آئین ءِ واکداری مہ بیت ءُ انساپ مہ رس ایت۔
بنشون: درشان اکس: وی بی ایم پی
