ھاران ءَ 25 جولائی 2018 ءِ گچینکاری ءِ وھد ءَ اولنگی پولنگ اسٹیشن ءَ پاکستانی لشکر ءِ ھندی کُشندہ ٹولی ءِ دست ءَ بیگواہ کنگ بیتگیں زھگ کپایت اللہ ءِ آجو نہ بیگ ءِ بگیری ءَ چار شمبے ءِ روچ ءَ ھاران ءِ شھر ءَ روانکے کشگ ءُ دمگدار ءِ کارگس ءِ دیم ءَ زھرشانی کنگ بیتگ۔ روانک ءَ سیاسی، مذھبی، نودربر گل، سول سوسائٹی ءُ جتاھیں بھرگانی مردماں ھوار جنین ءُ زھگاں مزنیں کچے بھر زُرتگ۔ آیانی دست ءَ پلے کارڈ، بینرز ءُ کپایت اللہ ءِ اکس بیتگ، مردماں آئی ءِ آجوئی ءَ لوٹ کرتگ۔ ھمے وھد ءَ ترانکاراں تران کرتگ ءُ گوشتگ کہ کپایت اللہ ءِ کھول گوستگیں چنچو روچاں زھرشانی کنگ ءَ اِنت، بلے سرکاری ترامگیج بے توار ءُ ندارگ چارگ ءَ اَنت۔چہ بد بھتی ءَ سے سال بیت کہ یک یازدہ سالی ئیں زھگے زورانسری بیگواھی ءِ آماچ اِنت، بلے سرکاری ترامگیجانی گوشاں مورے نہ وارت۔ آیاں گوشتگ کہ آ وھد ءَ کپایت اللہ زورانسری بیگواہ کنگ بیتگ، آئی ءِ اومر کساس ھشت سال بیتگ، یک ھشت سال ئیں زھگے ءِ آوار جنگ مردمی ھکانی لپاشگ اِنت۔ یک زھگے ءَ گوں کے ءَ دُژمنی بیت۔ آیاں ءَ گوشتگ کہ کپایت اللہ ءِ کھول ءِ ووٹ نہ دیگ ءِ بیر ءَ کپایت اللہ ءَ بد کرداریں ٹکی میر ءُ مستراں بیگواہ کنائینتگ۔ آئی ءَ گوشتگ کہ اد ءَ گچین بیتگیں ایم پی اے ءِ بے تواری ءَ مئے سَرپِر نہ بیت کہ آ جھان ءَ گول ایت ءُ مردمی اگبالانی درگت ءَ تران کنت، بلے وتی شھر ءَ یک یازدہ سالی ئیں زھگے بیگواہ اِنت، آ تُک ءُ نُک اِنت۔ کپایت اللہ ءِ کھول ءَ دزبندی کُرتگ ءُ گوشتگ کہ مردم دوست مئے گوں ءَ ھم توار بہ بنت ءُ یازدہ سالی ئیں زھگ ءِ آجو کنائینگ ءَ وتی کردار ءَ پیلو بہ کن اَنت۔ کھول ءَ گوشتگ کہ ما گوستگیں سے سالاں درد ءُ رنج سگگ ءَ ایں، مزن آمیدگس کپایت اللہ ءَ وتی کانود ءُ راھبند ءِ رد ءَ آجو بہ کنت ءُ مئے کمک ءَ بہ کنت۔
بنشون: دمگی اھوالکار/اکس: دامگ