ریڈیو زْرمبش بلوچی | ریڈیو زْرمبش بلوچی

ھزدار: پاکستانی لشکر وتگڑیں سی ٹی ڈی ءَ دروگیں میڑ ءَ سے مردم کشتگ ءُ آیانی جون ھزدار نادراھجاہ ءَ سر کرتگ اَنت۔

سی ٹی ڈی ءَ ٹاپار جتگ ءُ گوشتگ کہ اے مردم آجوئی لوٹوکیں سلاہ بندیں گلانی کارمند اَنت کہ میڑ ءَ جنگ بوتگ اَنت۔ سی ٹی ڈی ءَ گوشتگ کہ چہ کشگ بوتگیں مردماں پرپٹ، تراکناکیں شورہ، سے دستی بمب، یک وتاسے ءُ دو سی تیری دستیگ کرتگ۔

سرکار ءِ رد ءَ کشگ بوتگیں مردمانی نام آپتاب پنام شاہ میر ء جمیل اھمد سمالانی جھمنند شال کلی گوھر آباد، ھمزہ پنام پلین ء مھمد ابراھیم شاھوانی جھمنند واشک ءُ اَبدُاللہ پنام ھاشر ء ارز مھمد زھری جھمنند لوٹانی زھری اِنت۔

یات بہ بہ اِت کہ بلوچستان ءَ سی ٹی ڈی ءِ دروگیں میڑاں کشگ بوتگیں مردم چہ زور بیگواھیں مردماں پجارگ بوتگ انت۔ بلے چہ آدگہ بنشونانی نیمگ ءَ اے مردمانی بارو ءَ ھچ وڑیں ھال دیم ءَ نہ یتکگ۔ #BalochistanCrisis

بنشون: اھوالکار / اکس: دامگ