اسلام آباد ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءِ سروک ڈاکٹر مھرنگ ءَ ماں چاگردی رسانکدر ایکس ءَ نبشتگ کہ ھما مردم ھمے گوش اَنت پاکستان ءَ مردمی ھکاں تیوک ءَ لشکر لگتمال کنگ ءَ اِنت پمیشکا تیوگیں ریاست ءَ ایشی زمہ وار مہ گوش اِت۔
ما اے جست ءَ کن ایں کہ لشکر مردمی ھکاں لگتمال کنت ءُ کشت ءُ کوش کنت گڑا آدگہ ادارہ بزاں پارلیمنٹ ءُ آمیدگس کئی پلو ءَ اوشت اَنت؟ آئی ءَ گوشتگ کہ گوستگیں ھپتاد ءُ پنچ سالانی تہ ءَ برجاھیں چکچینی ءَ آمیدگس ءُ پارلیمنٹ ءِ چے کرد بوتگ؟
ڈاکٹر مھرنگ ءَ گوشتگ کہ آدگہ درساں یل کن اِت، ما گوستگیں ماھے بیت زوریں بیگواھی ءُ درکانودی کوش ءِ بگیری ءَ روانک کنگ ءَ ایں، گوستگیں دہ روچ بیت ما اسلام آباد ءَ ساڑی ئیں مئے گون ءَ کماش جنین ءُ زھگ ھوار اَنت، مئے سر ءَ اسلام آباد ءَ سر بوگ ءَ لٹ شاپ کنگ بیت، دزگیر کنگ بہ این ءُ یکشل ءَ بیھار ءُ زوراکیانی دیمپانی ءَ کنگ ءَ ایں۔
اے میان ءَ شمئے پارلیمنٹ ءُ آمیدگس ءَ اے درسانی دارگ ءَ چے کرد پیلو کرتگ؟ آئی ءَ گوشتگ کہ شمئے آمیدگس، پارلیمنٹ ءَ ھوار ریاست ءِ درسیں ادارہ وت اے کشت ءُ کوش ءُ زوراکیاں بے توار بنت ءُ پلہ مرزی کن اَنت گڑا ما سرپد بہ ایں گڑا اے راستے تیوگیں ریاست مئے چکچینی ءَ شریدار اِنت۔
