کراچی:مھبت جھمنند لیاری ءِ کھول ءَ وتی درشانی ءَ گوشتگ کہ مھبت پشری ءَ مزوری کرتگ،رکشہ ھَلائینتگ ءُ وتی گِس ءِ ھرچ ءُ درچ کش اِت ءُ وتی گزران کرتگ۔ آ بے میار اِنت، اگاں مھبت ءَ چونیں میارے ھست گڑا گوں آئی ءَ کانودی کاروائی کنگ بہ بیت۔ اے وڑ ءَ بیگواہ کنگ کھول ءِ آزار دیگ اِنت، اے وڑ ءَ بیگواہ کنگ ناھکی یے؟ آئی گوشتگ کہ وھدے مھبت آوار جنگ بیتگ، مارا ھمے گوشگ بیتگ کہ جُست ءُ پرس کنگ ءَ پد یل کنگ بیت، بلے سے ماہ ءِ گوزگ ءَ اَبید مھبت انگت بیگواہ اِنت۔ آئی گوشتگ کہ پاکستان ءِ سر وزیر امران ھان،آمیدگس، سند ءِ سروزیر ءُ گوں آدگہ واکداراں دزبندی کن ایں کہ مھبت ءِ یل کنائینگ ءَ وتی کِرد ءَ پیلو بہ کن اَنت۔ کھول ءَ گوں مردمی اگبالانی ترامگیج، سیاسی ءُ چاگردی کارکناں دزبندی کُرتگ کہ بیست پروری ءَ یک شمبے ءِ روچ ءَ پہ مھبت ءِ آجوئی ءَ پُر ایمنیں روانکے چہ کراچی ءِ آرٹس کونسل ءَ داں کراچی پریس کلب کشگ بیت۔ درسیں مردم دوست روانک ءَ بھر بزور اَنت ءُ گوں ما ھمراھدری بہ کن اَنت، پہ مھبت ءِ آیل کنائینگ ءَ وتی کردار ءَ پیلو بہ کن اَنت۔
بنشون: کھول /اکس: دامگ
