بلوچ نیشنل موومنٹ ءِ سرکماش ڈاکٹر نسیم بلوچ ءَ گوشتگ کہ مرچی پارٹی ءِ پشیگیں کارگشاد ڈاکٹر منان بلوچ ءِ شھیدی ءِ نوھمی سالروچ اِنت۔ 30 جنوری 2016 ءَ زورگریں پاکستانی لشکر ءَ آ مستونگ ءَ گوں دگہ چار ھمبلانی ھمراھی ءَ شھید کرتگ۔ گوں آئی ءَ بابونوروز، ھنیپ بلوچ، اشرپ بلوچءُ ساجد جان ریاستی لشکر ءَ نشانگ کُرتگ۔ اے روچ ءَ مزنشانیں رھشون ڈاکٹر منان بلوچ گوں سیاسی باسکاں پارٹی ءِسیاسی تر ءُ گردے ءَ بیتگ۔ بلوچ سرڈگار ءِ آجوئیءِ پرکار ءُ یک مھکمیں توارے بیتگ کہ پاکستان ءَ اوپار کُت نہ کُتگ۔ اے ترند ءُ مھکمیں توار گوں توپک ءِ زور ءَ بے توار کنگ بوت۔
آئی ءَ گوشتگ کہ ڈاکٹر منان بلوچ تھنا یک سیاسی سروکے نہ بیتگ، بلکیں آ مئے راجی زرمبشت ءِ پگری بنیاد ءُ لیکھی چیدگ بیتگ۔ آ سکا پولکار ءُ زانتکاریں انسانے بیتگ۔ آئی ءَ پہ زانت ءِ بنیاد ءَ وتی زندگی پہ بلوچ راج ءِ آجوئی ءَ ندر کرتگ۔ آئی ءَ ڈاکٹرے ءِ بستار ءَ گندگ ءَ شریں زندگی یے ءِ گوازینگ گچین کرت کرتگ بلے آئی بلوچ ءِ سرڈگار ءِ ایردستی ءُ راجی پجار ءِ تُرس ءَ آئی ءَ جھد ءِ راہ گچین کرتگ۔ آئی مارشت، آئی جھد ءُ لیکہ ءَ آئی ءَ بے توار بوگ ءُ ندارگ چارگ ءَ نہ اشتگ۔ آئی وت ءَداں گڈی دمان ءَآجوئی، انساپ ءُ پہ راجی شرپ ءُ راھبندانی سر ءَ برجاہ داشتگ ءُ ھمے راہ ءَ وتی جان ندر کرتگ۔
ڈاکٹر نسیم ءَ گوشتگ کہ پاکستانی ریاست ءَ ڈاکٹر منان پمشکا نشانگ کرتگ کہ آ اے زوراکی ءِ دستیگ ءُ لٹ ءُ پلیں سرکار ءِ بگیری ءَ یک مھکمیں توارے بیتگ۔ آئی ءِ کوش یک وئیلے نہ بیتگ بلکیں بلوچ راج ءِ بگیری ءَ برجاھیں زوریں بیگواھی، درکانودی کوش ءُ برجاھیں چکچینی ءِ درچ اِنت۔ آئی ءِ مول پہ آجوئی ءَ چست بیتگیں ھمک توار ءِ بے توار کنگ بیتگ بلے زورگریں ریاست چہ وتی مول ءَ بے سوب بیتگ۔ ڈاکٹر منان بلوچ ءِ کوش ءَ اے جھد ھلاس نہ کرتگ بلکیں بلوچ راجی گھگیری ءِ گیشتر مھکم کنگ ءِ سوب جوڑ بیتگ۔ آئی ءِ دیمونی ءَ نوکیں پدریچ مھکم کرتگ ءُ اے کاروان گیشتر گوں توکل ءُ مھکمی ءَ دیم ءَ جنزگ ءَ اِنت۔
آئی ءَ گوشتگ کہ اے روچ بلوچ راجی زرمبشت ءِ تہ ءَ ھمے اھد ءُ پیمان ءِ روچ اِنت، ھمک دمان ءَ گیش مھکم بوگ ءَ اِنت۔ ما ھمے کول ءَ کن ایں کہ ڈاکٹر منان بلوچ ءِ واب بلوچستان ءِ آجوئی یک ھیالی یے چیزے نہ بیت بلکیں راست بیت۔ ما راست کن ایں کہ آئی ھون زوال نہ بنت بلکیں مئے جھد ءَ سرڈگار سیراپ کرتگ۔ آئی لیکہ ھمک باسمائیں بلوچ ءِ تہ ءَ زندگ اِنت ءُ زوراکیانی دیم ءَ سر جھل نہ کنت ءُداں وتی سرڈگار ءِ آجوئی ءُ وتواکی ءَ گھگیری کنت۔
ڈاکٹر نسیم ءَ گوشتگ کہ بلوچ چکچینی ءُ رتکگیں ھون چہ میان استمان ءِ زرد ءَ ھمے لوٹ ءَ کن اَنت کہ آ بلوچستان ءَ پاکستان ءِ ریاستی ناشرکاری ءُ جنگی میارباریاں بہ من اَنت ءُگوں نزوریں بلوچاں ھم سنتی بہ کن ا َنت۔ میان استمان داں ھمنچو دیر ءَ بے توار بیت گڑاآئی سر ءَ بلوچ ءِ ھونانی وام ھمنچو گیش بنت۔ آیاں بے تواری ءَ ندارگ چارگی نہ اِنت چی ءَ کہ پاکستان ءُ آئی رستریں لشکر بلوچ راج ءَ کُشگ، زوریں بیگوہ ءُ یکشل ءَ انسانی ھکانی بگیری ءَ گیش ترند کنگ ءَ اِنت۔ بلوچ راج پہ انساپ ءُ آجوئی ءَ مڑگ ءَ اِنت ءُ پہ جھان ءَ الم اِنت کہ آ زوراکیءِ بگیری ءَ اے جھد ءَ مئے ھمتوار بہ بنت۔
آئی ءَ گوشتگ کہ ڈاکٹر منان بلوچ ءُ آئی ھمبل گوں تیراں بے توار کنگ بیتگ اَنت بلے ھیال ءُ لیکہ کشگ نہ بیت۔ آ مرچی ھم زندگ اَنت، ڈاکٹر منان ءُ ھمبلانی ھر ھما مارشت زندگ اِنت ءُ ایردستی ءَ نہ من ایت۔ ھمک گام ءَ جنزاں اِنت ءُ آجوئیءِ نیمگ ءَ روگ ءَ اِنت ھمک ھما توار ءِ تہ ءَ زندگ اِنت کہ آ پہ زوراکی ءِ بگیری ءَ چست بیتگ۔ آیانی دیمونی بلوچ راجی جھد ءِ گوستانک ءِ تہ ءَ ابدمان بیتگ ءُ چو یک چراگے ءِ وڑ ءَمئے راہ ءَ رژنا کنت، دانکہ یک بلوچے ایردستی ءِ بگیری ءَ مڑگ ءَ اِنت۔ ڈاکٹر منان بلوچ ءِ مارشت زندگ اِنت ءُ آئی جھد برجاہ اِنت۔ سوبمندی الم کیت چی ءَ کہ زوراکی ءِ روچ ھمک وھد ءَ نہ مان اَنت بلے آجوئی ھمک باسمائیں راج ءِ اولی بے مٹیں لوٹ اِنت ۔
