بلوچستان آجوئی سنگر ( بی ایل ایپ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں بیست ءُ ھشت نومبر ءَ پنچ شمبے ءِ روچ ءِ نوہ ءُ پانزہ ءَ تربت ءَ بنڈ ءِ بُن، دو کُرم پڑی آپسر ءَ پاکستانی لشکر ءِ دو گاڑی ءُ دو پرپٹانی کاروان ءِ سر ءَ گوں آر پی جی، ایل ایم جی، اسنائپر ءُ آدگہ سلاھاں پیش ءَ سنگر گپتگ ءُ اُرش کرتگ۔ اُرش ءَ سپاھی رمزان ءَ ھوار سے کارمند مرتگ ءُ نائیک شمس الدین ءُ لانس نائیک امان اللہ ٹپی بوتگ اَنت۔
آئی ءَ گوشتگ کہ چہ راکٹ ءِ گولا ءِ لگگ ءَ لشکر ءِ یک گاڑی ءُ یک پرپٹے ءَ بن کرتگ۔
جارکش ءَ گوشتگ کہ بلوچ سرمچارانی سوبمندیں اُرش ءَ پد پروش وارتگیں لشکری کارمنداں چو مدامی وڑ ءَ تیرگواری کرتگ ءُ لس آبادیانی سر ءَ بیڑ برتگ ءُ لس مردم زوراکی ءِ نشانگ کرتگ ءُ زور بیگواہ کرتگ اَنت۔
آئی ءَ گوشتگ کہ اُرش ءَ پد سرمچار پہ سلامتی وتی مھکمیں سنگراں شُتگ اَنت۔
جارکش ءَ گوشتگ کہ اے ارش ءِ ھال بی ایل ایپ ءِ انٹیلجنس بھرگ ءَ داتگ، اے اُرش گوں نوکیں چیرجنگی رپکاں آسر کنگ ءُ دژمن بےوس کُرتگ کہ اے مئے ارمچارانی گھتریں کارشونی ءُ چیرجنگی رپکاں درا کنت۔
آئی ءَ گوشتگ کہ اے اُرش ءَ بے میاریں شھریانی زد ءَ کپگ ءَ ما بژنیگیں۔ ما باز رند ءَ گوں وتی راج ءَ دزبندی کرتگ کہ آ چہ ریاستی لشکر ءِ کارمنداں دور بہ بنت، چی ءَ کہ مئے سرمچار ھمک وھد ءُ ھمک جاہ ءَ دژمن ءَ نشانگ کرت کن اَنت۔ مئے جھد آجوئی ءِ گرانبھائیں ڈیوا ءِ بالینگ اِنت ایشی تہ ءَ مئے راج پجار ءُ ھستی اندیم اِنت۔
جارکش ءَ گوشتگ کہ ما یک رندے پد ءَ گوں وتی راج ءَ لوٹ کن ایں کہ چہ دژمن ءِ گستا بہ بہ اِت ءُ وت ءَ بہ پھریز اِت دانکہ مئے جھد ءِ میان ءَ بلوچ راج ءَ جانی ءُ مالی تاوان مہ بیت۔ اے جھد پہ بلوچ راج ءَ اِنت ءُ ما ھم نہ لوٹ ایں کہ مئے اُرش پہ آیاں جنجالے ءِ سْوب جوڑ بہ بیت۔
میجر گھرام ءَ اُرش ءِ زمہ واری منّ اتگ ءُ گوشتگ کہ داں بلوچستان ءِ آجوئی ءَ دژمنیں لشکر ءِ سر ءَ ارش برجاہ بنت۔
