شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5460 روچ سرجم بوتگ۔ دوشمبے ءِ روچ ءَ چہ پنجگور ءَ مسلم لیگ ن ءِ دمگی سروک کازی رزا الی، راشد، یونس، ریاز ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ پہ مردمی ھکانی لگتمالی ءِ بگیری ءَ راجی ایمنیں جھد ءِ نھاد ءَ وتی دیمونی سرپد بوگ ءُ گوں نہ ترسی ءَ ریاست ءِ زوراکیانی دیم پہ دیمی ءَ کنگ ءَ اَنت۔ زوریں بیگواھیانی شوندات ءِ سوڑگ ءِ واک پاکستانی لشکر ءُ چیریں ادارھانی دست ءَ اِنت۔ زورگپتیں بلوچستان ءَ بے لگامیں ریاستی ناشرکارمردمی ھکانی بگیری ءِ جیڑہ ءِ منگ ءَ موکل نہ دے اَنت۔
آئی گوشتگ کہ بلوچستان ءِ ایمنی، زوربیگواھیں بلوچ پسگانی کیس ءِ آمیدگس پہ کاروائی ءَ شرسرپد اِنت بلے اے جیڑہ ءِ واک پاکستانی لشکر ءِ دست ءَ اَنت، گڑا اے تچکیں گپے کہ لشکر جیڑھانی گیش ءُ گیوار ءَ وتی وڑ ءَ کنگ لوٹ ایت۔
ماما کدیر گوشتگ کہ اے دمگ ءِ دیمروئی ءُ وشھالی گوں بلوچستان ءَ بندوک اِنت، چوناھا چین ءُ سئودی پہ مردمی ھکانی لگتمالی ءِ باروا میان استمان ءِ زورانی دیمپان اَنت۔ اگاں آ پاکستان ءَ چونیں ھم کمکے بہ کن اَنت گڑا آ کمک بلوچستان ءَ پہ مردمی ھکانی لگتمالی ءَ کارمرز بیت۔ ھمے سوب ءَ نہ تیوک ءَ بلوچانی نیمگ ءَ کینگ گیش بوگ ءَ اِنت بلکیں مردمی ھکانی لگتمالی ءَ میان استمان ءِ زور دیگ گیش بوگ ءَ اِنت۔
