شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5404 روچ سرجم بوتگ۔ چارشمبے ءِ روچ ءَ جتائیں سیاسی ءُ چاگردی کارکن پہ ھمدرری درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ مسلمان پہ وتی آئید ءِ شاتکامیاں چن ءُ لانچ کنگ ءَ اَنت۔ بلے بلوچ وتی آزیزانی ژانگولیں لاشاں دزگرگ ءَ اِنت گڑا بلوچ راج چون آئید بہ کنت۔ اگاں آئید ءَ شاتکامی بہ کن ایں گڑا چون بہ کن ایں؟ یک ماتے آئید ءِ روچ ءَ وتی زھگ ءِ لاش ءِ دزگرگ ءَ پد چون آئید کنت۔
آئی ءَ گوشتگ کہ ھما مردم گوں وتی کھول ءَ آئید ءَ شاتکامی کن اَنت آ مردماں الم یک دمانے ھما زھگ گیر آرگ لوٹ اَنت کہ گوں وتی درتگیں پچاں پہ وتی پت ءِ آھگ ءِ ودار ءَ دروازگانی دپ ءَ اوشتاتگ ءُ رھچار اَنت مئے پد کدی کیت ءُ پما نوکیں گد ءُ چمپل کار ایت۔ چہ وتی زھگانی گماں رنجیگیں مات ءُ گھار پریس کلبانی دیم ءَ پہ وتی آزیزانی آجوئی ءَ چہ سالاں زھرشانی کنگ ءَ اَنت۔
ماما کدیر گوشتگ کہ مرچی مارا وتی شاتکامی پہ ھما مردماں ندر کنگ لوٹ اَنت کہ آ پما آزار اوپار کنگ ءَ اَنت۔ من گوں درسیں سیاسی ءُ چاگردی پارٹی ءُ گل، بلوچ وومن پورم، بلوچ یکجھتی کمیٹی، سول سوسائٹی ءُ وکیلاں ھوار ھمک بھرگاں سیادی داروکانی گون ءَ لوٹ کن آں کہ آئید ءِ روچ ءَ نیمروچ ءِ دو ءَ شال پریس کلب ءِ دیم ءَ بیا اَنت ءُ گوں زور بیگواہ ءُ شھیدانی کھولاں روانک ءَ بھر بزور اَنت ءُ مات ءُ گھارانی گون ءَ ھمتوار بہ بہ اَنت۔
آئی ءَ گوشتگ کہ آئید ءِ روچ ءَ کراچی پریس کلب ءِ دیم ءَ بیگواھیں بلوچانی توار ( وی بی ایم پی ) ءِ کارگشاد سمی دین ءِ سروکی ءَ روانکے کشگ بیت من گوں کراچی ءِ جاہ مننداں دزبندی کن آں کہ آ روانک ءَ بھر بزور اَنت۔
