بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اےءِ سرمچاراں تربت ءَ ارشے ءِ میان ءَ زورگریں پاکستانی لشکر ءِ یک کمکارے کشتگ۔
آئی ءَ گوشتگ کہ سرمچاراں زی تربت ءِ ھند ڈنک ءَ یک ارشے ءَ چاریگ امان اللہ ء گلام جاہ منند گوکدان کشتگ۔ اے مردم زورگریں لشکر ءِ جوڑ کرتگیں کشندہ ٹولی ءِ یک پرکاریں سروکے بیتگ۔
جارکش ءَ گوشتگ کہ کمکار امان اللہ ءَ زورگریں لشکر ءَ 2020 ءَ بلوچ آجوئی لوٹوکیں گلانی تہ ءَ ھوار بوگءُ چاریگی کنگ ءِ گوشتگ اَت۔ بی ایل اے ءِ چیریں تک ءَ نہ تیوک ءَ اے شوربندی بلکیں اے مردم ءِ کارانی بابتءَ سرجم ءَ سرپدی داتگ اَت۔ سرمچاراں چیریں تک ءِ ھالانی بنیاد ءَ گوں آئی ءَ وتی رھوتکاری برجاہ داشتگ اَت دانکہ گوں آئی ءَ نزیکی بہ کن اَنت۔ اے کمکار امان رند ءَ چہ سرمچارانی چاریگی ءَ بے سوب بیتگ اَت ءُ سلام کنگ ( سرینڈر ) ءِ دروگ بستگ اَت ءُ تچک ءَ گوں کشندہ ٹولی ءَ ھوار بیتگ اَت۔
آئی ءَ گوشتگ کہ کمکار امان تربت ءِ ھند گوکدان، بھمن، شاھی تمپ ءُ کِر ءُ کشانی ھنداں کار ءَ بیتگ۔ آئی ٹولی گساں بیڑ برگ، ورنایانی زوریں بیگواھی ءُ کوشاں ھوار اِنت۔ چہ آیاں اے مردم ھم لشکر ءِ کمکار بیتگ۔ اے کمکار ءَ تربت ءَ پاکستانی لشکر ءَ تر ءُ گردانی میان ءَ جاھانی پکا کنگ ءِ زمہ واری ھم داتگ۔
جارکش ءَ گوشتگ کہ بلوچ کشیں میارباریاں ھوار بوگ ءِ بنیاد ءَ بلوچ آمیدگس ءَ پہ امان ءَ مرگ ءِ سزا گوشتگ ، ھمیشی بنیاد ءَ سرمچاراں کار کرتگ ءُ آئی ءَ گڈی آسر ءَ سر کرتگ۔
جیھند بلوچ ءَ آئی کوش ءِ زمہ واری من اِتگ ءُ گوشتگ کہ اے ٹولی ءَ ھواریں آدگہ مردم نشان اَنت زوت یا دیر سرمچارال آیاں گڈی آسر ءَ سر کن اَنت۔
