شال: پہ زور بیگواھیں مردمانی پدجنگ ءَ وی بی ایم پی ءِ شدکشیں زھرشانی گدان ءَ 5694 روچ سرجم بیتگ۔ پنچ شمبےءِ روچ ءَ سیاسی ءُ چاگردی کارکن گلام دستیگر، میا ھان، کتب ھان، نیشنل پارٹی ءِ سروک ابدالگپار کمبرانی ءُ آدگہ مردم پہ ھمدردی درشان کنگ ءَ گدان اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ چہ پاکستان ءِ زوراکیاں بلوچانی دل ءَ پہ ریاست ءَکینگ رُستگ۔
آئی ءَ گوشتگ کہ راستی ھمیش اِنت ناشریں ریاست وانگجاھاں بلوچاں آزار دیگ ءَ اِنتءُ بلوچستان ءِ وانگجاھاں ابید آزار دیگ ءَ دگہ ھچ نیست۔ نودربر نشان کنگ ءُ زور بیگواہ کنگ بوگ ءَ اَنت۔
ماما کدیر گوشتگ کہ بلوچستان ءَ جنگ ءِ تیز بوگ ءِ گمان اِنت، بلوچستان یک انچیں جاورےءَ گوزگ ءَ اِنت کہ ھزارانی کچ ءَبلوچ پاکستانی چیریں ادارھانی آزارجاھاں بیگواہ اَنت ءُ آزار اوپارانی دیمپان اِنت۔
