بلوچ اسٹوڈنٹس ایکشن کمیٹیءِ جارکش ءَ وتی شنگ کرتگیں درشانے ءَ گوشتگ کہ جھانءِ تہ ءَ کج ءَ ھم چونیں راجے ءَ دیمروئی کرتگ، گڑا آئی چہ باسمائی ءُ زانشت ءَ بوتگ۔ زانشت ءُ باسمائیءِ بنیاد کتاب اِنت، ایشی ازریشت وھد ءِ ھواری ءَ گیش بوگ ءَ اِنت۔اے یک تچکیں راستی یے کہ ھما راج کتاب وان اَنت، آ راج مرچی جھان ءِ تہ ءَ چہ زانت ءَ چکاریں راج گوشگ بنت۔
آئیءَ گوشتگ کہ گوستانک شاید اِنت کہ مرچی کج ءَ جھان ھمے زانشت ءُ کتاب ءِ برورد ءَ نوکیں پولکاری کنگ ءَ اِنت، ھمائی دومی نیمگ ءَ کتاب وانگ ءِ شوک سستی ءِ آماچ بوگ ءَ اِنت۔ اے ھما توانمندیں راجانی کار اَنت کہ آیاں وت چہ زانشت ءِ بنیاد ءَ دیمروئی کرتگ، بلےدیمروئی کنوکیں ڈیھانی دست ءَ کتاب پلگ بوتگ ءُ آیان ءَ جاھلی ءِ نیمگ ءَ تیلانک داتگ۔ جاھلیءُ تھارونکی ءِ بگیری ءَ جنگ چہ کتاب ءَ بندات بیت۔ پمشکا گوشگ بیت کہ راجی دانشور، راج ءِ اوست جوڑ بنت، چی ءَ کہ آ زان اَنت کتاب آشوبءِ رژن اِنت ءُ ند چہ زھمءَ تیز تر اِنت۔
آئیءَ گوشتگ کہ بلوچستان ءَ یک انچیں جاھے ھالیگ بوگ ءَ اِنت کہ اود ءَ روچ پہ روچ کتابانی سنگتی نزور گندگ بوگ ءَ اِنت۔ چوشیں باز مردم ھست کہ پولکاری ءَ دور بوگ ءُ نہ تھنا چہ پجار، دودمان ءُ گوستانک ءِ ھمگرنچی ءَ نابلد اَنت بلکیں ایشاں ارزیشت دیگ ءَ نہ اَنت۔ ما ھمے سرپد بہ ایں کہ اے ھم زورگرءِ زورگپتی ءِ سان اَنت۔ بلے چہ اے گپ ءَ مئے اوست گیش بیت کہ تیزگامیں دور ءِ تہ ءَ ھم بلوچستانءِ تہ ءَ بازیں ورنا ھست کہ آ کتابءَ دوست دار اَنت، کتاب زور اَنت ءُ وان اَنت۔ایشی یک تچکیں مسالے ھمیش اِنت کہ ھمک سال ءِ بندات ءَ آیاں کتاب میڑھانی ودار بیتءُ بلوچستانءِ بازیں ھند گوں کتاباں رنگیں بنت۔ پمشکا ما میان استمانی کتاب روچ ءَ بلوچستان ءِ ھما زاشنت دوستیں ورنایانی نام ءَ کن ایں کہ آ زانشتی پولکاری کن اَنت۔
بنشون: درشان اکس: مونوگرام
