ڈاڈر ءِ شھر ءَ سلاہ بندیں مردماں پولیس تانہ ءُ سرکاری کارگسانی سر ءَ اُرش کرتگ۔
اھوالکار ءِ رد ءَ سلاہ بندیں مردماں پولیس تانہ ءُ دگہ دو سرکاری کارگسانی سر ءَ گوں دستی بمب ءُ آدگہ سلاھاں اُرش کرتگ کہ اُرش ءِ آسر ءَ یک پولیس کارمندے مرتگ۔ اُرش ءِ وھد ءَ سلاہ بندیں مردماں دوئیں کارگس مانداشتگ اَنت۔
ھندی بنشون ءِ رد ءَ ڈاڈر ءِ جتائیں ھنداں سلاہ بندیں مردم تر ءُ گرد کنگ ءَ گندگ بوتگ اَنت۔
ھمے وڑ ءَ شمبے ءِ شپ ءَ سلاہ بندیں مردماں نوشکی ءَ پولیس تانہ ءَ اُرش کرتگ۔ تیرگواری ءِ آسر ءَ پولیس کارمند نسرت ءَ پاد ءَ تیرے لگ اِتگ ءُ ٹپی بوتگ۔ آ پہ الاج ءَ نادراھجاہ ءَ برگ بوتگ۔
دومی نیمگ ءَ شال ءِ ھند اسپن کاریز ءَ سلاہ بندیں مردماں بندساچی ءُ گیس ءِ شرکت ءِ سر ءَ اُرش کرتگ۔
اھوالکار ءِ رد ءَ سلاہ بندیں مردماں کمپنی ءِ مشین ءُ سامان مانداشتگ اَنت۔ انگت دگہ آوارجنی ءُ جانی تاوان ءِ ھال نیست۔
اے کاروائیانی زمہ واری انگت ھچ گل ءَ نہ زرتگ۔
بنشون: رسانکدر اکس: زرمبش
