بلوچستان لبریشن پرنٹ ءِ جارکش میجر گھرام بلوچ ءَ وتی درشان ءَ گوشتگ کہ سرمچاراں 22 اپریل ءَ آواران ءِ ھند کولواہ ءَ پاکستانی پوج ءِ کاروان ءِ سر ءَ اُرش کرتگ۔ پوج ءِ اے کاروان چہ بنجل ءَ درکپتگ ءُ دومی بنجل ءَ روگ ءَ بوتگ ۔
آئی گوشتگ کہ سرمچاراں دژمن ءِ اے کاروان کولواہ ءِ ھند گیشکور ءَ سھر ءُ گراڑی ءِ میان ءَ انگیر کرتگ ءُ گوں راکٹ، ایل ایم جی ءُ سنائپر ءَ نشانگ کرتگ۔ اُرش ءِ آسر ءَ پوج ءِ شش کارمند مرتگ ءُ باز ٹپی بوتگ دژمن ءِ گاڑی سکا تاوان بوتگ اَنت۔
جارکش ءَ گوشتگ کہ یک دگہ کاروائی یے ءَ سرمچاراں 22 اپریل ءَ بیسیمگ ءَ پولیس تانہ ءِ دیم ءَ برجاھیں پاکستانی پوج ءِ پٹ ءُ پولی جاہ ءَ کارمندانی سر ءَ گوں دستی بمب ءَ اُرش کرتگ۔ دستی بمب گاڑی ءِ تہ ءَ کپتگ کہ ایشی آسر ءَ کارمنداں جانی ءُ مالی تاوان بوتگ۔
جارکش ءَ گوشتگ کہ یک دگہ کاروائی یے ءَ سرمچاراں 19 اپریل ءَ جاؤ ءِ ھند گجرو، سنگین ءَ برجاھیں پاکستانی پوج ءِ چوکی ءِ سر ءَ چہ جتائیں نیمگاں گوں راکٹ، ایل ایم جی ءُ آدگہ وتکاریں سلاھاں اُرش کرتگ۔ اے کاروائی ءِ آسر ءَ باز مرتگ ءُ ٹپی بوتگ۔
میجر گھرام بلوچ ءَ درشان ءِ گڈی ءَ درسیں کاروائیانی زمہ واری من اِتگ۔
بنشون: درشان اکس: زرمبش
