
تربت: شھید آسم ءِ لوگبانک انیسہ ءِ گوں بلوچ یکجھتی کمیٹی ءِسروکاں تربت پریس کلب ءَ پریس کانپریس کرتگ ءُ گوشتگ کہ مئے گس ءَ یکشل ءَ ارش کنگ ءُ مارا سسائی نادراہ کنگ ءَ اَنت۔ مارا ابید چہ پیریں پت ءُ مات ءَ دگہ کس نیست۔ منی جود شھید آسم زوریں بیگواھیءَ پد درکانودی کشتگ ءُ آئی لاش چگل داتگ۔ ھما ریاستی لشکر ءُ آئی ھندی کارمند مئے گس ءَ روگ ءُ آھگ ءَ اَنت ءُ مارا دلسیاہ کنگ ءَ اَنت۔
آئیءَ گوشتگ کہ لشکر ءُ کشندہ ٹولی ءِ کار،مند مارا یکشل ءَ گوں جتائیں وڑ ءُ پیماں ترسینگ ءَ اَنت، مارا سک دیر اِنت کہ ما آیانی زوراکیاں اوپار کنگ ءَ ایں۔ کونشکلات ءَ دو رند ءَ مئے گس چہ لٹ ءُ پل کنگ ءَ پد ماندارگ بیتگ اَنت۔
آئی ءِ گوشتگ کہ یک رندے پل آباد ءَ منی برات ءِ سانگبدانی گس ماندارگ بیتگ اَنت۔ پاری سے رند ءَ مئے گس ءَ ارش کنگ بیتگ ءُ دروازگ ءُ دریگ تیر جنگ ءُپروشگ بیتگ اَنت۔ اود ءَ مال ءُ گرانھادیں سامان ھم برگ بیتگ اَنت۔
آئیءَ گوشتگ کہ گوستگیں شپ ءَ پد ءَ مئے گس ءَ ارش کرتگ ءُ درواگ ءُ دریگ پروشتگ اَنت، اے رندی مئے گس ءَ گرنیڈے چگل دیگ بیتگ، پولیس ءَ ایپ آئی آر نبیستگ ءُ پٹ ءُ پول کنگءِ دلجمی داتگ۔
آئی ءَ گوشتگ کہ ما گوں سرکارءَ لوٹ کن ایں مئے سر ءَ زوراکیاں بند بہ کنت۔ ما گوں بلوچ راج ءَ دزبندی کن ایں کہ اے زوراکیانی بگیری ءَ توار چست کنگ ءَ مئے گوں ما ھمتوار بہ بنت۔