شال: وائس پار بلوچ مسنگ پرسنز ءَ وتی درشانے ءَ چہ گْوادر ءِ ھند جیونی پانوان ءَ پاکستانی پوج ءِ دست بیگواھیں الی ازگر ء نور مھمد ءِ بیگواھی ایر جتگ ءُ گوشتگ آئی کھول ءَ گوں وی بی ایم پی ءِ کارگشاد ھوران بلوچ ءَ رھوت کرتگ ءُ گوشتگ کہ پاکستانی پوج ءَ الی ازگر شپ ءَ آوار جتگ ءُ بیگواہ کرتگ کہ ھما اِنت آئی بابت ءَ مارا سرپدی دیگ نہ بوتگ۔ چہ ایشی ءَ مئے سرجمیں کھول جنجالانی دیمپان اِنت۔
ھوران بلوچ ءَ گوشتگ چونیں ھم شھری یے ءِ درکانودی آوار جنگ ءُ بندیگ کنگ انسانی ھک ءُ پاکستان آئین ءِ تچک ءَ لگتمالی اِنت۔ اگاں الی ازگر ءِ سر ءَ چونیں ھم بھتامے ھست آئی ءَ آمیدگس ءَ پیش بہ کن اَنت۔
آئی گوشتگ کہ زوربیگواھی ءِ درچ زوت بند کنگ بہ بیت الی ازگر ءَ ھوار درسیں بیگواھیں مردم آجو کنگ بہ بنت ءُ آیانی کھول چہ جنجالاں درکنگ بہ بنت۔
وی بی ایم پی ءَ گوں سرکار ءُ ادارھاں لوٹ کرتگ کہ الی ازگر زوت دیم ءَ آرگ ءُ پہ آئی آجوئی ءَ دلجمی دیگ بہ بیت۔ اگاں آئی سر ءَ چونیں بھتامے ھست آمیدگس ءَ پیش کنگ بہ بیت۔
بنشون: درشان اکس: رسانکدر
