بلوچ یکجھتی کمیٹی ءَ شال ءَ پولیس ءِ دست ءَ اسرار بلوچ ءُ مھمد ھالد ءِ کوش ءَ بژن درشان کرتگ ءُ گوشتگ کہ اسرار بلوچ ء مھمد انور بیست ءُ پنچ سالی ورنایے ءُ شال ءِ ھند کلی کمبرانی دگ، کلی بنگلزھی ءِ جاہ منند اِنت۔ 25 مارچ 2026 ءَ پولیس ءَ درکانوی آوار جتگ ءُ جتائیں پولیس اسٹیشناں براں کرتگ ءُ پد ءَ نوکیں سریاب پولیس اسٹیشن ءَ ناھک ءَ درکانودی کشتگ۔اے میان ءَ آئی کھول سرپد نہ بوتگ ءُ باز آزار دیگ بوتگ۔
آئی ءَ گوشتگ کہ مھمد ھالد ء امیر مھمد ھژدہ سالی ورنایے ءُ مزدورے کہ آ نوشکی ءِ جاہ منند اِنت۔ آ گوں وتی سنگتاں شال ءَ اتکگ ءُ آ نادراھجاہ ءَ شتگ ءُ پہ انسانیت ءِ بنیاد ءَ کسے ءَ ھون داتگ۔ پد ءَ ھم ھمے بیگاہ ءَ سریاب دگ ءَ پولیس ءَ تیرگواری کرتگ، پد ءَ چہ آدگراں گستا برتگ ءُ آزار داتگ ءُ پد ءَ چہ نزیک ءَ تیر جتگ۔
بی وائی سی ءَ گوشتگ کہ گوں ٹپی ئیں جاوراں آ چیریں آزارجاھے ءَ برگ ءُ آزار دیگ بوتگ۔ رند ءَ کہ آ نادراھجاہ ءَ آرگ بوتگ آئی ٹپانی درد نہ سگ اِتگ ءُ بیران بوتگ۔ پد ءَ ھم آئی کھول ھال دیگ نہ بوتگ ءُ کھول پہ لاش ءِ دزگرگ ءَ جنجال بوتگ۔
آئی ءَ بژن درشان کرتگ ءُ گوشتگ کہ اے کوش یک دراجکشیں درچے ءِ بھر اَنت کہ ایشی رد ءَ لس شھری، مزدور، درزی ءُ ورنا درکانودی نشانگ بوگ ءَ اَنت۔
بنشون: درشان اکس: بی وائی سی
