بلوچستان لبریشن پرنٹ ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که سرمچاراں کیچ ءِ ھند تمپ ءَ کشنده ٹولی ءِ سروک نسیم کوھی ءُ شاپک ءَ زورگریں پاکستانی لشکر ءِ چوکی نشانگ کرتگ.
آئی ءَ گوشتگ که سرمچاراں کیچ ءِ ھند تمپ ، گومازی ءَ چیریں ھالانی بنیاد ءَ راجی میار بار ءُ کشنده ٹولی ءِ کارمند نسیم کوھی ء گھرام تیرگواری کرتگ ءُ کشتگ ءُ آئی ءِ سلاه ءُ آدگه سامان زرتگ اَنت.
جارکش ءَ گوشتگ که نسیم کوهی 13 مارچ 2018 ءَ بی ایل ایپ ءِ سرمچار شھید کیپٹن جھانگیر پنام ءِ جبار ء ھاجی اکبر ءِ بیگواھی ءُ شھیدی ءَ تچک ءَ ھوار بیتگ. بیگواھی ءِ میان ءَ شھید کیپٹن جھانگیر رستری آزار دیگ بیتگ ءُ آئی ءِ ژانگولیں لاش چگل دیگ بیتگ.
آئی ءَ گوشتگ که پاکستانی لشکر ءَ نسیم کوھی نه اِیوک ءَ سرمچارانی بگیری ءَ کارمرز کرتگ بلکیں چیریں ادارھاں آئی ءَ بلوچ ورنایانی زوریں بیگواھی، درکانودی کوش ءُ گسانی سر ءَ بیڑ برگ ءِ وڑیں مزنیں میار باری ءِ زمه واری داتگ۔
جارکش ءَ گوشتگ که آ زورگریں پاکستانی لشکر ءِ ھمرائی ءَ بلوچ سرمچارانی بگیری ءَ لشکری لشکرکشیاں ھم ھوار بیتگ. ایم آئی ءَ آ گومازی ءَ کشنده ٹولی ءِ سروک کرتگ ءُ بازیں مردم آئی ءِ سروکی ءَ بلوچ ءِ بگیری ءَ کاراں ھوار بیتگ اَنت.
آئی ءَ گوشتگ که نسیم کوهی بلوچ سرمچار کیپٹن جھانگیر ءِ شھیدی ءِ ھواری ءَ بلوچ ورناھانی شھیدی ، بلوچ راج ءِ سر ءَ زوراکی، چاگردی ناشرکاریاں ھوار بوگ ءُ په دژمن ءَ چاریگی ءِ مزنیں میارباریانی بنیاد ءَ گل ءِ آمیدگس ءَ آ میاربار کرتگ. ھمے بنیاد ءَ آ داں دراجکشیں وھدے ءَ بی ایل ایپ ءِ نشانگ ءَ بیتگ که سرمچاراں 17 اپریل 2025 ءَ چیریں ھالانی بنیاد ءَ کاروائی ءَ کشتگ ءُ گڈی آسر ءَ سر کرتگ.
جارکش ءَ گوشتگ که دومی کاروائی ءَ بی ایل ایپ ءِ سرمچاراں 17 اپریل ءَ شپ ءِ یازده ءُ نیم ءَ کیچ ءِ ھند شاپک ءَ بارگ کوه ءَ زورگریں پاکستانی لشکر ءِ برجاھیں چوکی گوں گرنیڈ لانچر ءَ نشانگ کرتگ که گولا نشانگ ءَ لگ اتگ اَنت ، ایشی آسر ءَ زورگریں لشکر ءَ جانی ءُ مالی تاوان بیتگ.
میجر گھرام بلوچ ءَ دوئیں اُرشانی زمه واری من اِتگ ءُ گوشتگ که درسیں ریاستی چریکاں کڈن کن اِیں که ریاست ءِ پرمان ءَ بلوچ راج ءِ بگیری ءَ میارباریں ھمک مردم ءُ ٹولیاں گڈی آسر ءَ سر کن اِیں که آ ایشی ءِ ھکدار اَنت ءُ داں بلوچستان ءِ آجوئی ءَ زورگریں لشکر ءُ آئی ءِ چریکاں نشانگ کن اِیں.
