بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں آواران ءُ جاؤ ءَ زورگریں پوج ءُ پروم ءَ کشندہ ٹولی ءِ سر ءَ اُرش کرتگ۔ ایشی آسر ءَ دو پوجی کارمند ءُ دو کشندہ ٹولی ءِ کارمند مرتگ ءُ باز ٹپی بوتگ۔
آئی ءَ گوشتگ کہ بی ایل ایپ ءِ سرمچار 6 دسمبر ءَ پروم ءَ گل ءِ ترّ ءُ گردے ءَ بوتگ اَنت کہ کشندہ ٹولی ءِ کارمنداں رندگیری کنگ ءِ جھد کرتگ۔ سرمچاراں سنگر گپتگ ءُ کشندہ ٹولی ءِ کارمند نشانگ کرتگ اَنت۔ ایشی آسر ءَ یک گاڑی یے سرجم ءَ زد ءَ کپتگ کہ گاڑی ءَ سواریں دو کارمند جاھی مرتگ ءُ کشندہ ٹولی ءِ باز کارمند ٹپی بوتگ۔
جارکش ءَ گوشتگ کہ ارش ءَ پد کشندہ ٹولی ءِ آدگہ کارمنداں وتی گاڑی یل داتگ اَنت ءُ جستگ اَنت۔ رند ءَ زورگریں پوج جنگجاہ ءَ اتکگ ءُ مرتگیں پوجیانی لاش ءُ تاوان بوتگیں گاڑی برتگ اَنت۔
آئی ءَ گوشتگ کہ دگہ یک کاروائی یے ءَ 7 دسمبر ءَ بی ایل ایپ ءِ سرمچاراں آواران ءِ ھند تیرتیج جک ءَ کوہ ءِ سر ءِ پوج ءِ چوکی ءَ اوشتاتگیں یک کارمندے گوں اسنائپر ءَ نشانگ کرتگ۔ ایشی آسر ءَ ایپ سی ءِ کارمند جاھی مرتگ۔ اے اُرش ءَ پد پاکستانی پوج ءَ کواڈ کاپٹر ءِ سر ءَ سرمچارانی نشانگ کنگ ءِ جھد کرتگ بلے سرمچاراں کواڈ کاپٹر نشانگ کرتگ ءُ دور داتگ۔
جارکش ءَ گوشتگ کہ ھپت دسمبر ءِ بیگاہ ءِ پنچ ءَ جاؤ ءِ ھند ڈولیجی ءَ برجاھیں چوکی ءَ اوشتاتگیں یک کارمندے گوں اسنائپر ءَ نشانگ کرتگ، ایشی آسر ءَ یک کارمندے جاھی مرتگ۔ ارش ءَ پد پوج ترس آماچ بوتگ ءُ باز مارٹر آس داتگ۔
آئی ءَ گوشتگ کہ بی ایل ایپ راجی آجوئی جھد ءَ شھید بوتگیں سرمچار ساجد پنام کاکا رھمت ء ابد اللہ جاہ منند گومازی ءَ ستک شانی ندر کنت۔
جارکش ءَ گوشتگ کہ شھید ساجد بلوچ یک دسمبر 2025 ءَ گل ءِ کارے ءَ بوتگ کہ چہ مار ءِ ورگ ءَ آئی جاور ناگیگ بوتگ اَنت ءُ آئی ٹپانی درد نہ سگ اِتگ ءُ بیران بوتگ۔ گل آئی گرانکدریں کاراں دروت ندر کنت۔
آئی ءَ گوشتگ کہ شھید ساجد بلوچ 2013 ءَ راجی آجوئی جھد ءَ ھوار بوتگ ءُ بی ایل ایپ ءِ سرمچارے بوتگ۔ یک سالے ءَ شھری کاراں سرگرم بوتگ ءُ 2014 ءَ کوہ ءَ اتکگ۔
جارکش ءَ گوشتگ کہ شھید ءَ چہ وتی جھد، جپاکشی ءُ رویشتاں گل ءِ راھبندانی سر ءَ کار کرتگ ءُ بازیں جنگانی تہ ءَ جوانیں کرد پیلو کرتگ۔ شھید ساجد بلوچ گوں وتی ھمراھاں جتائیں سوبمندیں جنگاں بھر زرتگ۔ شھید ساجد بلوچ تمپ، مند، تربت، گْوادر، زامران ءُ دشت ءَ ھوار بازیں ھنداں گل ءِ کاراں بھر زرتگ۔ شھید ساجد چہ وتی جنگی بودناکیانی سوب ءَ وتی ھمبلانی تہ ءَ ٹک تیر ءِ نام ءَ زانگ بوتگ۔
میجر گھرام بلوچ ءَ ارشانی زمہ واری منّ اتگ ءُ گوشتگ کہ پہ بلوچستان ءِ آجوئی ءَ شھید بوتگیں ساجد بلوچ ءَ ستک شانی ندر کن این ءُ ھمے کول ءَ کن ایں کہ شھیدانی کاروان ءَ داں گڈی منزل ءَ سر کنگ ءَ جھد ءَ برجاہ دار ایں۔
