بلوچ یکجھتی کمیٹی ( بی وائی سی ) ءِ جارکش ءَ وتی شنگ کرتگیں درشان ءَ گوشتگ کہ دالبندین ءَ چیئرمین زبیر بلوچ ءِریاستی پوج ءِ دست ءَ درکانودی کوش بلوچ چکچینی پالیسی ءِ درچ اِنت ءُ بلوچ سیاسی کارکنانی بگیری ءَ ریاستی رستری ءِ گڈی سیمسر اِنت۔ اے ویل بلوچستان ءَ برجاھیں ریاستی زوراکیانی انچیں کڑی یے کہ آئی پیش داشتگ کہ ریاست سیاسی توارانی گوش دارگ ءَ ابید توپک ءِ سر ءَ بے توار کنگ ءِ جھد ءَ تیز کنگ ءَ اِنت۔
آئی ءَ گوشتگ کہ گوستگیں چنچو سال اِنت بلوچستان گوں یک کوش جاھے ءَ مٹ کنگ بیتگ۔سیاسی کارکنانی زوریں بیگواھی، آیانی سرءَ دروگیں بھتام، ترسینگ، درکانودی کوش دودے جوڑ بیتگ۔ تھنا یک ھپتگے ءِ میان ءَ چار مردم دروگیں میڑاں کشگ بیتگ ءُ سے مردم زوریں بیگواھی ءَ پد پہ کوشانی چیر دیگ ءَ دروگیں میڑ ءِ ٹاپار جنگ بیتگ ءُ نوں زبیر بلوچ ءِ درکانودی کوش ءِ چیر دیگ ءِ جھد ءَ دروگیں میڑ ءِ ٹاپار ءَ جنگ ءَ اَنت۔
جارکش ءَ گوشتگ کہ زبیر بلوچ یک سیاسی کارکنے بی ایس او ( پجار ) ءِ پیشیگیں چیئرمین ، یک وکیل ءُ زانتکاریں سیاسی توارے بیتگ۔ آمدام بلوچستان ءَ انسانی ھکانی لگتمالی، زوریں بیگواھی ءُ مھلوک ءِ بنیادی ھکانی بگیری ءَ اوشتاتگ۔ آئی کوش تھنا یک مردمے ءِ جان ءِ تاوان نہ اِنت بلکیں بلوچستان ءِ سیاسی کارکنانی بگیری ءَ ریاستی زوراکیاں پیش دار ایت۔
آئی ءَ گوشتگ کہ چیئرمین زبیر بلوچ ءِ کوش یک مردمے ءِ تاوان نہ اِنت بلکیں سرجمیں بلوچ راج ءِ تاوان اِنت۔ بلے گوستانک گواہ اِنت کہ چہ اے وڑیں میارباری ءُ زوراکیاں کدی ھم مھلوک ءِ توار ءِ دارگ ءَ سوبین نہ بیتگ اَنت ءُ نہ دیم ءَ بنت۔ ما گوں بلوچ مھلوک ءَ لوٹ کن ایں کہ وتی سر ءَ بیتگیں ریاستی زوراکیاں ھچ وڑ ءَ بے توار مہ بہ اِت۔
