اسلام آباد ءَ بلوچ یکجھتی کمیٹی ءِ سروکانی ناھکیں بندیگ کنگ ءُ زور بیگواھیں مردمانی آجوئی ءَ برجاھیں زھرشانی نندانک ءَ پنجاہ ءُ ھپت روچ سرجم بیتگ کہ انگت ءَ برجاہ اِنت۔
آیایاں چو مدامی وڑ ءَ مرچی ھم زھرشانی روانکے کش اتگ ءُ پہ وتی لوٹانی ھک ءَ اوگام جتگ ءُ بلوچ یکجھتی کمیٹی ءِ بندیگیں سروک ءُ زور بیگواھیں مردمانی آجوئی ءِ لوٹ کرتگ۔
آیانی گوشگ اِنت کہ مئے اد ءَ زھرشانی کنگ ءِ مول ھمیش اِنت ڈاکٹر ماہ رنگ بلوچ ءَ ھوار بلوچ یکجھتی کمیٹی ءِ ناھکءَ بندیگیں سروک یل کنگ بہ بنت، زور بیگواھیں مردم آجو کنگ بہ بنتءُ بلوچستان ءِ زوریں بیگواھی بند کنگ بہ بیت۔
آیانی گوشگ اِنت بلوچستان ءَ بلوچ یکجھتی کمیٹی ءِسروکاں ھوار آدگہ سیاسی کارکنانی دزگیر کنگءِ مول ھمیش اِنت کہ اود ءَ کس پہ وتی ھک ءُ زوریں بیگواھی ءُ ریاستی زوراکیانی بگیری ءَ توار چست مہ کنت۔
آیانی گوشگ اِنت کہ مئے لوٹ ڈیھ ءَ آئین ءُ کانود ءِ رد ءَ اَنت دانکہ مئے لوٹ منگ نہ بیتگ اَنت ما وتی زھرشانی ءَ برجاہ دار ایں۔
