بلوچستان لبریشن پرنٹ ءِ جارکش میجر گھرام بلوچ ءَ اپریلءِ کاروائیانی رپورٹ شنگ کرتگ ءُ گوشتگ کہ سرمچاراں اپریل ءَ پاکستانی پوج، ادارہ ءُ شوربندیانی سر ءَ اُرش کرتگ۔ اے کاروائی پروم، پَسِنی، تُربَت، ھزدار، بیسیمگ، جاؤ، چاگی، واشک، مند، مستونگ، بارکان، کلات، کردگاپ، کولواہ، مشکے، شال ءُ آواران ءَ ھوار دگہ ھبدہ جاھاں کرتگ اَنت۔ اے درسیں کاروائیانی بنیادی مول زورگریں ریاست ءِ تاوان دیگ ءُ بلوچستان ءَ پوجی زورگپتی ءِ ھلاس کنگ اِنت۔
آئی گوشتگ کہ اپریل ءِ ماہ ءَ سی کاروائی کرتگ کہ آئی تہ ءَ زژمن ھمک سنگر ءَ تاوان داتگ۔ بی ایل ایپ ءِ مھکمیں اُرشانی آسر ءَ زورگریں پوج ءِ 39 کارمند کشتگ ءُ ھشت ءَ گیش ٹپی کرتگ۔
آئی گوشتگ کہ اپریل ءِ درساں مزنیں کاروائی جاؤ ءِ ھند سیڑھ ءَ کنگ بوتگ۔ اود ءَ سرمچاراں دژمنیں پوج ءِ کاروان ءِ سر ءَ ترندیں اُرشے کرتگ۔ اُرش ءِ آسر ءَ دژمن ءِ دہ کارمند مرتگ ءُ باز ٹپی بوتگ۔ اے اُرش ءَ زورگریں پوج ءِ سَے گاڑی سرجم ءَ تباہ بوتگ۔ اے اُرش ءَ دژمن ءِ یک کواڈکاپٹرے ھم سرمچاراں نشانگ کرتگ ءُ تباہ کرتگ۔
آئی گوشتگ کہ پوج ءِ دیم ءَ آیگ ءِ جھد ءَ بی ایل ایپ ءِ سرمچاراں سَے مزنیں پوجی بنجل ءُ دو چوکیانی سر ءَ گوں ٹوھیں سلاھاں اُرش کرتگ۔ اے اُرشانی آسر ءَ دژمن ءَ بازیں کچے ءَ جانی ءُ مالی تاوان داتگ۔
آئی گوشتگ کہ دژمن ءِ راشن ءِ کمک ءِ دارگ ءَ سرمچاراں اپریل ءِ ماہ ءَ ھپت جتائیں ھنداں دگ بندی کرتگ۔ اے دگ بندیانی وھد ءَ سرمچاراں دژمن ءِ کمک ءُ تر ءُ گرد داشتگ۔ جتائیں ھنداں نشانگی آپریشناں پوج ءِ کاروان شش رند ءَ نشانگ کرتگ اَنت۔
جارکش ءَ گوشتگ کہ دژمن ءِ تکنیکی نزام ءِ نزور کنگ ءَ سرمچاراں چہ دژمن ءِ نیمگ ءَ جتگیں چاریگی نوکیں نزام نشانگ کرتگ اَنت۔ ھمے میان ءَ جتائیں کاروائیاں پنچ ڈرون جتگ ءُ پہ چاریگی ءَ جتگیں یک نوکیں کیمرہ ءُ سَے موبائل ٹاور تباءِ کرتگ۔ اے کاروائیانی مول دژمن ءُ چیریں بھرگ ءِ چاریگی ءِ نزور کنگ اِنت۔
آئی گوشتگ کہ دژمن ءَ مالی تاوان ءِ دیگ ءِ شوربندی ءِ رد ءَ زورگریں پوج ءِ دوازدہ کسان ءُ مزنیں گاڑی گوں تراکناکیں شورہ ءُ راکٹاں تباہ کرتگ۔ جتائیں میڑاں پشت کنز اِتگیں کارمندانی ھشت سلاہ ءُ آدگہ سامان دستیگ کرتگ۔
جارکش ءَ گوشتگ کہ پوجی کاروائی برجاہ داشتگ ءُ اے ماہ ءَ دژمن ءِ بگیری ءَ جتائیں جنگی ھنر کار گپتگ اَنت ءُ نھ رند ءَ دژمن ءِ سر ءَ گوں ٹوھیں سلاھاں اُرش کرتگ۔ چار رند ءَ سنگر گپتگ ءُ اُرش کرتگ، سَے بر ءَ سنائپر اُرشاں دژمن نشانگ کرتگ ءُ سَے آئی ای ڈی تراک کرتگ۔ چہ ایشاں ابید ھاران ءُ ھزدار ءَ گرنیڈ لانچر ءُ دستی بمب اُرشاں دژمن ءِ چوکی نشانگ کرتگ۔
آئی گوشتگ کہ اپریل ءَ پہ ماتیں وتن ءِ رکینگ ءَ اے جنگ ءَ بی ایل ایپ ءِ ھپت سرمچاراں گوں دلیری ءَ جنگ داتگ ءُ شھید بوتگ اَنت۔ اے شھیداں وتی گرانبھایں جانانی دیمونی داتگ ءُ آجوئی جھد ءِ ڈیوا بالینتگ۔ شھیدیں سرمچاراں چہ وتی گرانبھائیں دیمونیاں دژمن ءَ پیش داشتگ کہ بلوچ راج ءَ پوج ءِ زور ءَ ایردست کرت نہ کنے۔ پہ راجی آجوئی ءِ مول ءَ وتی جانانی دیمونی دیوکیں درسیں شھیداں ستک شانی ندر کن ایں ءُ ھمے کول ءَ کن ایں کہ شھیدانی کاروان ءَ منزل ءَ سر کن ایں ءُ چہ دژمن ءَ آیانی ھون ءِ ترمپ ترمپ ءِ ھساب ءَ گر ایں۔
بنشون: رپورٹ اکس: زرمبش
