بلوچ اسٹوڈںٹس آرگنائزیشن آزاد ءِ جارکش شولان بلوچ ءَ وتی درشان ءَ شھیدیں سنگت اجاز بلوچ ءُ شاہ نواز بلوچ ءِ ھواری ءَ آپتاب بلوچ ءُ باسد بلوچ ءَ ستک شانی ندر کرتگ ءُ گوشتگ کہ آیاں پاکستان ءِ زورگپتی ءِ بگیریءَ سیاسی جھد کرتگ ءُ وتی جان ندر کرتگ اَنت۔
آئیءَ گوشتگ کہ اجاز بلوچ ءُ شاہ نواز بلوچ نہ ترسیں سیاسی کارکن ءُ آشوبی لیکہ ءِ منوگر بوتگ اَنت۔ بلوچ چاگرد ءَ یک مزنیں سیاسی لیکھےءِ پارست ءَ پہ آشوب آرگ ءَ وتءَ بلوچ ورنا ءُ مھلوک ءِ تہ ءَ داشتگ ءُ بلوچستان ءِ ھکی ئیں آجوئی زرمبشت ءِ بابت ءَ زانت بکشگ ءَ ندر کرتگ۔ باسمائیں سنگت بوتگ اَنت کہ چہ وتی توکل ءُ بودناکی ءَ پہ گل ءِ ھنکین ءِ مھکم کنگ ءَ جوانیں کرد پیلو کرتگ۔
شولان بلوچ ءَ گوشتگ کہ یک انچیں وھدے ءَ پاکستانی زورگریں ریاست ءِ نیمگءَ کشگ ءُ چگل دیگ ءِ پالیسی تیز بوتگ ءُ ھمک بلوچ سیاسی کارکن ءَ زوریں بیگواھی ءُ درکانودی کوش ءِ ترس بوتگ،بلے آ تمرد بوتگ اَنت۔ چہ گیشیں زوراکیاں ابید آیاں مھلوک ءِ تہ ءَ سیاسی گھگیری ءِ اوست ھلاس نہ کرتگ۔
جارکش ءَ گوشتگ کہ 15 ایریل 2015ءَ آیانی سور ءِ وھد ءَ پاکستانی پوج ءَ مشکے ءِ میتگ گورجک ءَ بیڑ برتگءُ باز گس مانداشتگ چاریں سیاسی کارکن اجاز، شاہ نواز، باسد ءُ آپتاب آوار جتگ اَنت، زوریں بیگواھیءِ دومی روچ ءَ آیان ءَ ناھک ءَ کشتگءُ لاش مشکے ءَ چگل داتگ اَنت۔
شولان بلوچ ءَ وتی درشان ءِ گڈی ءَ گوشتگ کہ آ پرایمنیں سیاسی کارکن بوتگ اَنت ءُ پہ بلوچستان ءِ آجوئی ءَ جھد کنگ ءَ بوتگ اَنت۔ آیاں وتی جانانی دیمونی داتگ بلے چہ راجی آجوئی زرمبشت ءَ پدکنز نہ بوتگ اَنت۔ ما وتی شھیدیں سنگتاں ستک شانی ندر کن اینءُ زوراکیانی بگیری ءَ گھگیری ءَ آیانی یاتاں دروت ندر کن ایں۔
ننشون: درشان اکس: مونوگرام
