بلوچ یکجھتی کمیٹی ءَ وتی درشانے ءَ گوشتگ کہ ھژدہ مارچ ءَ بی وائی سی ءِ بگیری ءَ ریاستی زوراکی ءَ پد باز مردم دزگیر کنگ ءُ آیانی سر ءَ ایپ آئی آر کنگ بوتگ کہ آیانی تہ ءَ بلوچ یکجھتی کمیٹی ءِ سروکاں ھوار باز مردم ءِ نام ھوار اِنت۔ زھرشانیانی وھد ءَ بازیں مردم دزگیر کنگ ءُ آیانی سر ءَ ایپ آئی آر نبیسگ بوتگ۔ چہ آیاں لھتیں پد ءَ پہ مانزمانی ءَ یل کنگ بوتگ اَنت کہ یکشل ءَ پہ جست ءَ زندان ءَ پیش بوتگ اَنت۔
آئی گوشتگ کہ چہ ایشی ءَ ابید کم چہ کم دو ورنا زوربیگواہ کنگ بوتگ۔ گوستگیں ھپتگ ءَ گریشگ ءِ جھمنندیں ورنا مھراج مدام آمیدگس ءَ پیش بوگ ءَ ابید چہ شال ءَ آوار جنگ ءُ بیگواہ کنگ بوتگ۔ ھمے وڑ ءَ دو روچ پیش ابدلگپار کیازھی ھم زوربیگواہ کنگ بوتگ کہ آ ھم ھمے کیسانی سر ءَ یکشل ءَ پیشیاں روگ ءَ بوتگ۔ اے وڑیں مردمانی زوربیگواہ کنگ کہ آیاں وت ءَ پیسر ءَ کانود ءِ دست ءَ داتگ ءُ آمیدگسی کاروائیاں پیش بوتگ اَنت، ریاست ءِ وت وتی آمیدگس ءِ نہ منّگ اِنت۔
آئی ءَ گوشتگ کہ زی گل ءِ سروکاں ھدہ بندیگجاہ ءَ جست ءُ پرس ءِ وھد ءَ اے رویشت ءِ بگیری ءَ زھرشانی کرتگ ءُ چہ پیشی ءَ دزکشی کرتگ ءُ جج ءِ دیم ءَ پیش داشتگ کہ کانود ءِ رد ءَ مانزمان دیگ ءَ ابید مھراج ءُ ابدلگپار ءِ زوریں بیگواھی پہ ترا شرم ءِ گپے ءُ تئی زمہ واری اِنت کہ تو وت زوریں بیگواھیاں ھواریں پوج ءُ چیریں ادارھانی بگیری ءَ گامگیج بہ زور۔
آئی گوشتگ زوربیگواھیانی ءُ بلوچ چکچینی ءِ بگیری ءَ بلوچ یکجھتی کمیٹی ءِ جھد ھرچ رنگ ءَ برجاہ بیت۔ چہ اے جھد ءَ مئے دارگ ءَ ریاست ءِ ھمک پندل گوں وھد ءِ ھواری ءَ بے سوب بوان کنت۔ بلوچ یکجھتی کمیٹی ھرچ رنگ ءَ اے جھد ءَ برجاہ دار ایت، دانکہ زوراک ءِ کانود مٹ نہ بنت۔ ما ھچ وڑ ءَ بے توار نہ بہ ایں۔
بنشون: درشان اکس: مونوگرام
