ھب چوکی: زور بیگواھیں زھیراھد ءِ زھگ ءُ بی وائی سی پنجگور ھنکین ءِ سروک زیشان زھیر ءِ ناھکیں کوش ءِ بگیری ءَ بی وائی سی ءِ نیمگ ءَ زھرشانی روانکے کشگ بوتگ۔ زھرشانی روانک ءِ دارگ ءَ پولیس ءُ سادہ پوشاکیں مردماں زھرشانی کنوکانی سر ءَ بیڑ برتگ ءُ تیرگواری کرتگ۔ چہ ایشی ءَ باز مردم ٹپی بوتگ۔ ھمے میان ءَ پولیس ءَ بیگواھیں مردمانی کھولاں ھوار باز مردم دزگیر کرتگ۔
بلوچ یکجھتی کمیٹی ءَ اے ارش گوں ترندیں دانکاں ایر جتگ ءُ گوشتگ کہ پُرایمنیں زھرشانی ءِ ھک ھر شھری ءَ راھبند ءُ انسانی ھکانی بنیاد ءَ دیگ بوتگ کہ ایشی گوں زور ءِ سر ءَ دارگ بژن اِنت۔
بلوچ یکجھتی کمیٹی ءَ ایس ایس پی، ڈپٹی کمشنر ءُ ایم پی اے الی ھسن زھری ءَ اے ویل زمہ وار کرتگ ءُ گوشتگ کہ اے سروگاں ھب ءَ برجاھیں ریاستی زوراکی ءِ کمکار جوڑ بوتگ اَنت۔
بی وائی سی ءَ چہ انسانی ھکانی گل ءُ بلوچ راج ءَ لوٹ کرتگ کہ آ اے درانسانی گامگیج ءِ بگیری ءَ توار چست بہ کن اَنت ءُ ھب ءَ برجاھیں ریاستی زوراکیانی سر ءَ زوت دلگوش دیگ بہ بیت۔
