بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ وتی شنگ کرتگیں درشانے ءَ گْوشتگ بلوچ راجی زرمبشت ءَ گوستانکی سلاہ بندیں جھد نوکیں چیزے نہ اِنت، بلکیں یک گوستانکی درچے۔ بلوچ راج ءَ وھدے وتی زمین، پجار ءُ راجی پدریچ ءِ ترس دیستگ گھگیری وتی پرز لیک اتگ۔ چہ انگریز ءِ زورگپتی ءِ بگیری ءِ گھگیری ءَ بگر داں پاکستان ءِ دستیگ کنگ ءِ بگیری ءَ داں پاکستان ءِ بگیری ءَ برجاھیں جھد ءَ بلوچ سرمچاراں وتی ھون، دیمونی ءُ مھکمی ءَ اے جھد ءَ را شرپ، لیکہ ءُ گوں راجی گیرت ءَ ھمگرنچ کرتگ ءُ پیداک اَنت۔
آئی ءَ گوشتگ کہ مرچی سلاہ بندیں جھد نہ تھنا ترند بیتگ بلکیں گوں وتی گل ءِ بودناکی، لس مردمانی پلہ مرزی ءُ چیرجنگی کارشونی ءِ رد ءَ پاکستانی پوج ءِ لشکری توانمندی پاشک کرتگ۔ ھمک دومی روچ ءَ بلوچ سرمچار بلوچستان ءِ مزنیں شھدگاں بندگ ءُ لشکری کارواناں نشانگ کنگ ءَ اَنت ءُ داں چنت اداراں دگ بند اِنت بلے پاکستانی پوج اود ءَ گندگ نہ بیت۔ وھدے کہ سرمچار وتی مھکمیں بندراں رو اَنت گڑا ریاستی پوج وتی پروش ءِ جاہ ءَ لس شھریاں، کماش، جنین ءُ زھگانی سر ءَ کھر گوار ایت۔ اے کار ھمے چیز ءِ منانک اِنت کہ پاکستان ءِ ریاستی مشینری لیکھی، لشکری ءُ دودمانی ھساب ءَ تباہ بیتگ۔
ڈاکٹر نسیم بلوچ ءَ گوشتگ کہ پاکستان ریاست راجی زرمبشت ءُ آئی جز چیرجنگی گھگیری ءِ تچک ءَ دیم پہ دیمی ءَ کرت کنگ ءَ نہ اِنت۔ پہ بیرگیری ھیلہ ءَ زوریں بیگواھی، مچی سزا ءُ درکانودی کوش ءُ ژانگولیں لاش ریاستی شوندات ءِ بنیادی چیدگ جوڑ بیتگ اَنت۔ بلے اے ھم ترسناکیں چیزے کہ ریاست ءَ بے جاریں کشندہ ٹولی ( ڈیتھ اسکواڈ) ءَ پد اَمن لشکر ءِ نام ءَ ناشرکاری ءِ دروشم ءَ مھکم کنگ ءُ دیم ءَ آرگ ءَ اِنت۔
آئیءَ گوشتگ کہ کشندہ ٹولی ریاستی سروکی ءَ کارکنوکیں ناشریں مردمانی ٹولی اِنت۔ آ چہ پوج ءُ چیریں ادارھانی رد ءَ بلوچ چاگرد ءِ تہ ءَ آرگ بیتگ دانکہ راجی زرمبشت ءِ بگیری ءَ کاروائی بہ کنت، چاگرد ءِ تہ ءَ ناشرکاری بہ کنت، کارکناں آوار بہ جنت ءُ کشت ءُ کوش بہ کنت، ترس ودی بہ کنت ءُ ٹکی جیڑھاں دیم ءَ بیار ایت ءُ زرمبشت ءَ نزور بہ کنت۔ مرچی باندا اے کار ءَ پہ جار اَمن لشکر ءِ وڑیں ناماں بلوچستان ءِ وتگڑیں سرکار کنگ ءَ اِنت۔ انوگیں روچاں رکنی ءَ سرپرزا بگٹی ءِ برات آپتاب بگٹی ءِ سروکی ءَ یک لشکرے ءَ بلوچ سرمچارانی سر ءَ ارش کرتگ چہ ایشی ءَ چار سرمچار شھید بیتگ۔
ڈاکٹر نسیم بلوچ ءَ گوشتگ کہ بژنیگیں بھرگ ھمیش اِنت پاکستانی پوج بلوچستان ءِ جتائیں ھنداں داھش ءِ وڑیں میان استمانی ناشرکاراں جاہ بنجل ءُ ھیلکاری جاہ دیگ بیتگ۔ اے ناشرکاری ءَ نہ تھنا بلوچ زرمبشت بلکیں اے دمگ ءِ آدگہ ڈیھانی بگیری ءَ کار گرگ ءَ اِنت۔ص
